काठमाडौं । नवनिर्वाचित अमेरिकी राष्ट्रपति डोनाल्ड ट्रम्पको अभिव्यक्तिका कारण क्यानडा, मेक्सिको र चीनको मुद्रामा गिरावट आएको छ । न्युयोर्क टाइम्सका अनुसार, मेक्सिकोको मुद्रा पेसो डलरको तुलनामा एक दिनमा १.१८ प्रतिशतले कमजोर बनेको छ । सोही समयमा, क्यानेडियन डलर र अमेरिकी डलरको तुलनामा १ प्रतिशतले कमजोर भएको छ । जुन सन् २०२० को मेयता क्यानेडियन मुद्रामा आएको सबैभन्दा ठूलो गिरावट हो ।

योसँगै चीनको मुद्रा युआनमा पनि गिरावट आएको छ । चिनियाँ मुद्रा युआन डलरको तुलनामा ०.३ प्रतिशतले कमजोर भएको छ ।

ट्रम्पले शपथ लिएलगत्तै क्यानडा, मेक्सिको र चीनबाट अमेरिकामा आउने सामानमा भारी कर लगाउने घोषणा गरेका छन् । ट्रम्पले यी तीन देशले लागुऔषध र अवैध आप्रवासीलाई नियन्त्रण नगरेसम्म अमेरिकाले लगाएको भारी करको मार भोग्नुपर्ने बताएका छन् ।

ट्रम्पले सोमबार सामाजिक सञ्जालमार्पत क्यानडा र मेक्सिकोमा २५ प्रतिशत कर लगाउने घोषणा गरेका छन् । उनले क्यानडा र मेक्सिको दुवैले चाहेमा अवैध आप्रवासी र लागुऔषध (फेन्टानाइल) आपूर्तिलाई सजिलै नियन्त्रण गर्न सक्ने तर त्यसो नगरेको बताएका छन् । जसका कारण उनीहरूले चर्को मूल्य चुकाउनुपर्ने उनको भनाइ छ ।

ट्रम्पले चिनियाँ सामानमा ३५ प्रतिशत कर लगाउने घोषणा गरेका छन् । जुन मेक्सिको र क्यानडामा लगाइने करभन्दा १० प्रतिशत बढी हुने छ ।

सीएनएनबाट ।