![राष्ट्रिय उसु प्रतियोगिता : मिलन, पूर्ण, धन र चन्द्र सेमिफाइनलमा](https://12khari.top/uploads/posts/Ussu-1720028668.jpg)
काठमाडौं । एपीएफका मिलन राई, कोसी प्रदेशका पूर्ण राई, नेपाल प्रहरीका धनबहादुर तामाङ र वाग्मती प्रदेशका चन्द्र सुनुवार १६औँ राष्ट्रिय उसु प्रतियोगिताको ४८ केजीमा बुधबार सेमिफाइनलमा प्रवेश गरेका छन् ।
नेपाल उसु महासंघको आयोजनामा त्रिपुरेश्वरस्थित राष्ट्रिय खेलकुद परिषद् (राखेप)को कभर्डहलमा भइरहेको प्रतियोगिताको पुरुष ५२ केजीमा कोसीका जनम तामाङ, वाग्मतीका निरज लामा, नेपाल आर्मीका जनक धामी र एपीएफका अशोक खालिङले सेमिफाइनलमा स्थान सुरक्षित गरे ।
प्रतियोगिताको राखेपका सदस्य–सचिव टंकलाल घिसिङले एक कार्यक्रमबीच उद्घाटन गरे । सो अवसरमा चीनिया दूतावास, भिसा शाखाका निर्देशक छिन वन, चिनियाँ दूतावास, वैदेशिक शाखाका निर्देशक वाङ तोङ, राखेपका सदस्य एवं नेपाल उसु महासंघका अध्यक्ष जनक बर्तौलालगायतको उपस्थिति थियो ।
तीनदिने प्रतियोगितामा पाँच प्रदेश र तीन विभागीय गरी आठ टोलीका १०० खेलाडीको सहभागिता रहेको आयोजक महासंघका सचिव नवीन बस्नेतले जनाएका छन् ।
![Global Ime bank](https://baahrakhari.com/uploads/bigyaapan/30885600.gif)