काठमाडौं । धादिङमा एक व्यवसायीको गाडीमा अपरिचित व्यक्तिले सुटकेश छाडेर हिँडेका छन् । 

नीलकण्ड नगरपालिका–३, बीचबजारस्थित आफ्नै घरअगाडि रोकीराखेको बा १६ च ९१९२ नम्बरको गाडीमा अपरिचित व्यक्तिले शंकास्पद बस्तु छाडेर हिँडेको धादिङका प्रहरी उपरीक्षक गौतम केसीले जानकारी दिए । 

“आज दिउँसो साढे ३ बजे गाडीको डीकी खोलेर शंकास्पद सुटकेश राखेको हामीलाई जानकारी आएको छ,” एसपी केसीले भने, “सुरक्षा सर्तकता अपनाएर त्यसलाई डिस्पोज गर्ने तयारी गरेका छौँ ।”

स्थानीयका अनुसार निलो टिसर्ट र खैरो पाइन्ट लगाएको व्यक्ति गाडीको छेउमा सुटकेश लिएर बसिरहेका थिए । घटनाले बजारबासी त्रसित बनेका छन् ।