![अख्तियार आयुक्त अमात्यले गुठीको जग्गा मिचेर घर बनाएपछि ललितपुर महानगरले चलायो डोजर](https://12khari.top/uploads/posts/lalitpur3-1720001347.jpg)
काठमाडौं । अख्तियार आयुक्त सुमित्रा अमात्यले गुठीको जग्गा मिचेको पाइएपछि ललितपुर महानगरपालिकाले डोजर चलाइदिएको छ । ललितपुर महानगरपालिकाका मेयर चिरिबाबु महर्जनले बुधबार आफ्नै उपस्थितिमा डोजर चलाउन निर्देशन दिएका थिए ।
ललितपुर १० चाकुपाटस्थित सुमित्रा अमात्य सम्पदाको जग्गा मिचेर बनाएको पाइएपछि महानगरले खाली गराएको जनाएको छ । गुठीयार, आयुक्तको परिवार र महानगरबीच पटक पटक छलफल गरेर जग्गा खाली गराउन आग्रह गरिएको भए पनि अँटेरी गरेपछि डोजर चलाउनुपरेको महानगरले जनाएको छ ।
“आयुक्तको घरको मूलगेट र पर्खाल भत्काइदिएको छ,” महानगर स्रोतले भन्यो,“गुठियार, आयुक्त र महानगरबीच पटक पटक कुराकानी हुँदा पनि अँटेर गरेपछि भत्काउनुपरेको हो ।”
ललितपुर महानगरका मेयर चिरिबाबु महर्जनले गुठीको जग्गा भएको र गुठीयारले पटक पटक अनुरोध गर्दा पनि नमानेपछि भत्काउनुपरेको बताए ।
![Global Ime bank](https://baahrakhari.com/uploads/bigyaapan/30885600.gif)
बाह्रखरीसँग कुरा गर्दै उनले भने, “यो देवस्थलको जग्गा हो । महर्जन र अमात्य गुठी थियो । जहाँ भोज खाने र पूजा गर्ने स्थान थियो । त्यही नै हडपेको पाइयो । सम्पदा मिचेर पर्खाल बढाउने र ढोका राख्न अनुमति नदिँदा पनि बनाएपछि भत्काउनुपरेको हो ।”
उनका अनुसार महर्जन र अमात्य गुठीका पदाधिकारी पटक पटक महानगरसँग अनुरोध गर्न आएका थिए । उनीहरु लगातार जग्गा खाली गराइदिन भन्दै अनुरोधमा आएपछि भत्काउनुपरेको उनले बताए ।
स्थानीय सुरेशमान महर्जनले आफूहरुको आग्रहमा ललितपुर महानगरले अवैध संरचना भत्काइदिएको बताएका छन् ।
उनले मेयर र वडाध्यक्षलाई धन्यवाद दिँदैन गुठीको जग्गामा संरचना नबनाउन आफूहरुले पटक पटक आग्रह गर्दा पनि अमात्य परिवारले नमानेको बताए । अर्का एक ७० वर्षका स्थानीय कुकाल डंगोलले पनि महानगरलाई साथ दिन आफू आएको बताएका थिए ।
उनले जग्गा अतिक्रमण जस्तो काममा देशको महत्वपूर्ण निकायमा बसेका व्यक्ति नै संलग्न हुँदा नराम्रो लागेको बताए ।