पटना । भारतको उत्तर प्रदेशको हाथरसमा एक सत्संगको क्रममा ११६ जना मानिसको मृत्यु हुने गरी मच्चिएको भागदौडको कारण कथित बाबाको चरणको धूलो लिने क्रममा भएको बीबीसी हिन्दीले जनाएको छ । 

स्थानीय प्रहरी निरीक्षक सालभ माथुरले सो मृत्यु संख्याको बारेमा जानकारी गराएका हुन् ।  कार्यक्रममा धेरैजसो महिला र केटाकेटी रहेका थिए । 

प्रत्यक्षदर्शी र भक्तजनका अनुसार बाबाको चरणको धूलो लिने क्रममा भागदौड मच्चिदा निहुरेर धुलो लिनेक्रममा जो लडे उनीहरु  उठ्नै नसकेको जनाइएको छ ।  सो कार्यक्रममा ८० हजार मानिस उपस्थित हुने भनिएकोमा त्यो भन्दा बढी उपस्थित भएको जनाइएको छ । 

सो क्षेत्रमा धेरैजसो गरिबीमा रहेका मानिसहरु रहेको बताइएको छ ।  कतिपयले घटनापछि पनि बाबाले जे भन्यो त्यो पुग्ने गरेको र आफूहरुको हित हुने गरेको बताएको समाचारमा जनाइएको छ । 

बाबाको नाम नारायण साकार विश्व हरि उर्फ भोले बाबा भएको जनाइएको छ ।  गएराति सम्म थुप्रै मानिस हराइरहेको र आफन्तहरु त्यहाँ गएका आफ्ना मान्छे खोज्न भौंतारिएको जनाइएको छ । 

हाथरसको जनपदमा सिंकद्राराऊको नजिक मुगलगढी गाउँमा स्थानीय गुरु भोले बाबाको कार्यक्रमका क्रममा भएको भागदौडका कारण सो संख्यामा मानिसको मृत्यु भएको जनाइएको छ ।  मृतकमा पुरुष, महिला र बालबालिका समेत छन् ।

को हुन् बाबा ?

त्यत्रो घटना हुँदा पनि कार्यक्रम आयोजकका तर्फबाट भने अझै औपचारिक भनाइ नआएको जनाइएको छ । इकोनोमिक टाइम्सका अनुसार उनी उत्तर प्रदेशको इताह जिल्लाका मानिस हुन् ।  उनी यस्तो कार्यमा लाग्नु अघि उत्तर प्रदेश प्रहरीको गुप्तचर विभागमा लामो समय काम गरेका थिए । 

उनको पहिलाको नाम सुरजपाल भएकोमा अध्यात्मतिर लागेपछि आफ्नो नाम बदलेर नारायण साकार राखेका हुन् ।  उनी अध्यात्मतिर लागेपछि सधैं सेतो सुटमा देखिने गरेका थिए । कतिपय समयमा भने कुर्ता पाइजामामा पनि देखिन्थे । उनले स्वयम् ब्रम्हा, विष्णु र शंकरले पनि आफूलाई गुरु मान्ने सम्मको दाबी गर्ने गरेका थिए ।