काठमाडौं । इंग्लिस क्लब लिभरपुलले स्पेनिस क्लब रियाल मड्रिडविरुद्ध यूईएफए च्याम्पियन्स लिगमा १५ वर्षपछि जित निकालेको छ । लिभरपुलले बुधबार राति एन्फिल्डमा भएको खेलमा स्पेनिस जायन्टविरुद्ध २–० को जित निकालेको हो ।

लिभरपुलले यसअघि पछिल्लोपटक सन् २००८–०९ को संस्करणमा रियालविरुद्ध जित निकालेको थियो । च्याम्पियन्स लिगको प्रिक्वार्टरफाइनलमा लिभरपुलले रियालविरुद्ध ४–० को जित निकालेको थियो । त्यसयता च्याम्पियन्स लिगमै यी दुई टिमबीच आठ खेल भएको थियो । तीमध्ये सात खेलमा रियाल विजयी भएको थियो । एक खेल भने गोलरहित बराबरीमा टुंगिएको थियो ।

बुधबार घरेलु मैदानमा लिभरपुललाई जित दिलाउन एलेक्सिस म्याक एलिस्टर र कोडी गाक्पोले गोल गरे । लिभरपुलले दुवै गोल दोस्रो हाफमा गरेको थियो ।

खेलको ५२औँ मिनेटमा एलिस्टरको गोलमा लिभरपुलले अग्रता बनाएको थियो । ७६औँ मिनेटमा गाक्पोले घरेलु टिमको अग्रता दोब्बर बनाए । यसपछि दुवै टिमबाट गोल नहुँदा लिभरपुलले तीन अंक जोडेको हो ।

जारी सिजन शतप्रतिशत जित निकालेको लिभरपुल पाँच खेलबाट १५ अंकसहित तालिकाको शीर्ष स्थानमा उक्लिएको छ । लिभरपुललाई पछ्याइरहेको इन्टर मिलानको समान खेलबाट १३ अंक छ । समान खेलबाट ६ अंकको रियाल २४औँ स्थानमा छ । रियालले खेलेका पाँच खेलमध्ये यो तेस्रो हार हो ।