काठमाडौं । टीयू बीबीए कप फुटबल प्रतियोगिताको १६औँ संस्करण बिहीबारदेखि सुरु हुने भएको छ । उद्घाटन खेलमा साविक विजेता तथा आयोजक शंकरदेव क्याम्पस र केसीएमआईटी कलेजबीच प्रतिस्पर्धा हुनेछ ।

आयोजक स्वतन्त्र विद्यार्थी युनियन (स्ववियु), शंकरदेव क्याम्पसले मंगलबार पत्रकार सम्मेलन गर्दै प्रतियोगिताबारे जानकारी गराएको हो ।

चन्द एन्ड ब्रदर्स प्रा.लिको व्यवस्थापनमा हुन लागेको प्रतियोगिता काठमाडौंको सानो गौचरण खेल मैदानमा हुनेछ ।

प्रतियोगितामा त्रिभुवन विश्वविद्यालयअन्तर्गत व्यापार प्रशासनमा स्नातक गरिरहेका विद्यार्थीले मात्र सहभागिता जनाउन पाउनेछन् । सहभागी २६ टोलीलाई दुई पोलमा विभाजन गरिएको छ । 

प्रतियोगिताको विजेताले एक लाख रुपैयाँ प्राप्त गर्ने आयोजकले जनाएको छ । त्यस्तै, हरेक खेलका 'म्यान अफ द म्याच'लाई ट्रफी प्रदान गरिनेछ । 

यसैगरी, आयोजकले सर्वोत्कृष्ट खेलाडी र विधागततर्फ उत्कृष्ट हुने खेलाडीलाई विशेष पुरस्कारको व्यवस्था गरेको बताएको छ ।

महेन्द्र बहुमुखी क्याम्पस, धरानले आयोजना गरेको १५औँ संस्करणमा शंकरदेवले फाइनलमा काठमाडौंकै एनसिसीलाई टाइब्रेकरमा पराजित गर्दै उपाधि जितेको थियो । त्यसैले प्रतियोगिताको आयोजना गर्ने जिम्मेवारी शंकरदेवले प्राप्त गरेको हो ।

मंगलबार आयोजित पत्रकार सम्मेलनमा शंकरदेव स्ववियु सभापति सुशान्त बस्नेत, क्याम्पस विद्यार्थी कल्याणकारी कोषका अध्यक्ष जोगिन्दर गोयत, बीबीए निर्देशक ऋषिराम पन्त, अखिल नेपाल फुटबल संघ(एन्फा)का केन्द्रीय सदस्य रविन्द्र चन्दलगायतको उपस्थिति थियो ।