काठमाडौं । ललितपुर महानगरपालिकाका मेयर चिरिबाबु महर्जनले हिजोमात्रै आफूले अख्तियार दुरुपयोग अनुसन्धान आयोगका आयुक्त डा. सुमित्रा अमात्यको घरको कम्पाउन्डमा डोजर चलाएको २४ घण्टा बित्न नपाउँदै बयान पत्र प्राप्त गरेको बताएका छन् ।
उनले बाह्रखरीसँग कुरा गर्दै अख्तियारको पत्र प्राप्त गरेको बताए । अमात्यले सम्पदाको जग्गा मिचेर घरको कम्पाउन्ड र ढोका बनाएको पाइएपछि ललितपुर महानगरले पटक–पटक खाली गरिदिन अनुरोध गरेको थियो ।
स्थानीय गुठीयारहरु पटक–पटक महानगर पुगेर खाली गरिदिन अनुरोध गरेका थिए । त्यसपछि महानगरले आयुक्तका श्रीमान् डा. दिवस अमात्यसँग पनि बसेर कुराकानी गरेको थियो ।
तर उनले नमानेपछि डोजर चलाउनुपरेको महानगरले जनाएको छ ।
आयुक्त अमात्यले २०७८ सालमा ६ करोड खर्च गरेर घर खरिद गरेकी थिइन् । त्यसपछि कम्पाउन्ड बनाउने क्रममा महानगरबाट स्वीकृति लिइएको थिएन ।
![Global Ime bank](https://baahrakhari.com/uploads/bigyaapan/30885600.gif)
कम्माउन्डभित्रै सम्पदाको जग्गा परेपछि विवाद भएको थियो । ललितपुर महानगरले भत्काइदिने चेतावनी दिएपछि अख्तियारबाट पत्र काट्ने चेतावनी आएको स्रोतले जानकारी दियो ।
“म एक प्रजातन्त्रवादी नेता हुँ, मैले राज्यका संवैधानिक निकायको सम्मान गर्छु, हिजो डोजर चलाएँ, २४ घण्टा नबित्दै आज अख्तियारको पत्र पाएँ,” उनले भने, “पत्रअनुसारको मिति र समयमा म अख्तियारमा उपस्थित भएर संवैधानिक निकायको सम्मान गर्छु । तर अख्तियारले आफ्नो दायित्व भुल्नेछैन भन्नेमा म विश्वस्त छु ।”
आफूलाई धापाखेलका बाढी पीडितलाई किन राहत दिएको ? र सचिवालयमा किन दुई जनालाई नियुक्ति दिएको भन्दै पत्र काटिएको उनले बताए ।
त्यसबाहेक पनि एसईईमा बढी अंक ल्याउनेलाई किन पुरस्कार दिएको भन्दै आफूलाई पत्र काटिएको जानकारी दिए ।
“मलाई यही महिनाको २६ र २८ गते दुई दिन अख्तियारमा उपस्थित हुन भनिएको छ,” महर्जनले बाह्रखरीसँग कुरा गर्दै भने, “यसलाई प्रतिशोध भनौँ कि काकताली ? हिजो काम गरेँ, पत्र आज आइपुग्यो । यसरी हेर्दा प्रतिशोध भन्न मिल्छ तर एउटा पत्रको मिति अगाडिको राखिएको छ । अर्को एउटा पत्रको मिति हिजो नै राखिएको छ ।”
आयोगकै आयुक्त डा. सुमित्रा अमात्यले देवस्थलको जग्गा मिचेर पर्खाल लगाएपछि त्यसलाई भत्काएसँगै पत्र काटेको हुन सक्ने महानगरकै अर्का एक कर्मचारीको आरोप छ ।
अख्तियारमा स्थानीय तह हेर्ने जिम्मेवारी उनै आयुक्त अमात्यले पाएकी छन् । अमात्यले ‘स्वार्थ बाझिने’ विषयमा संवैधानिक अंगको शक्ति दुरुपयोग गरी दुःख दिएको आरोप महानगरपालिकाका अधिकारीहरुको छ ।