काठमाडौं । नेकपा (एकीकृत समाजवादी)को महाधिवेशनले पुरानै नेतृत्वलाई अनुमोदन गरेको छ ।  कमलादीस्थित प्रज्ञा भवनमा जारी महाधिवेशनले अध्यक्षमा माधवकुमार नेपाल र महासचिवमा घनश्याम भुसाललाई सर्वसम्मत चयन गरेको हो । 

सम्मानित नेता झलनाथ खनाल चयन भएका छन् । यसअघि तीन नेताहरु सोही पदमै थिए ।  २०७८ भदौमा नेकपा (एमाले) विभाजित हुँदा नेपाल अध्यक्ष बनेका थिए ।  दिल्लीमा उपचार गराइरहेका खनालले पार्टी विभाजनलाई साथ दिएका थिए । 

महासचिव बनेका भुसाल भने पार्टी विभाजन गर्नुपर्ने बैठकहरुमा साथ दिए पनि अन्त्यमा एमालेमा नै बसेका थिए ।  उनी ०७९ पुुस २९ गतेमात्रै एकीकृत समाजवादीमा प्रवेश गरेका थिए । उनी ०७९ चैतमा महासचिवमा मनोनीत भएका थिए ।

प्रतिनिधिसभाको चुनावमा स्वतन्त्र उमेदवारी दिएका भुसाल निर्वाचनमा पराजय बेहोरेपछि एकीकृत समाजवादीमा प्रवेश गरेका हुन् ।
 
अध्यक्षको दाबी गरेका भुसाल महासचिवमा नै दोहोरिए ।  एकीकृत समाजवादीले पार्टी विभाजनको तीन वर्ष नपुग्दै महाधिवेशन गरेको हो ।  असार १६ गतेबाट जारी महाधिवेशनमा अरु पद भने टुंगिन सकेको छैन । 
महाधिवेशनको हलमा अध्यक्ष मण्डलका नेता समेत रहेका खनालले बाँकी पदहरुमा सर्वसम्मत गरिने जानकारी दिए । 

उनले प्रतिनिधिहरुलाई अरु पदमा पनि सहमति गरिने र भोलि उपस्थित हुने गरी घर जान निर्देशन दिए ।  महाधिवेशन हलले बाँकी पद मिलाउने जिम्मा निवर्तमान सचिवालयलाई दिएको छ ।  भोलि सहमतिमा नै ती पद घोषणा गर्ने तयारी रहेको नेता जीवनराम श्रेष्ठले जानकारी दिए । 

“तीन पदमा सर्वसम्मत घोषणा भएको छ । बाँकी पदाधिकारी र केन्द्रीय सदस्य छान्ने अधिकार पहिलेकै सचिवालयले पाएको छ,” श्रेष्ठले भने । 

प्रतिनिधिहरुलाई भोलि बिहान ८ बजे उपस्थित हुुन निर्देशन दिइएको छ ।

कसरी भयो सहमति ? 

सम्मानित नेता खनाल महाधिवेशन अगावै अध्यक्षको रेसबाट बाहिरिएका थिए ।  उनले महासचिव भुसाललाई अध्यक्षमा सहयोेग गर्ने वचन दिएका थिए । तर, भुसाल पनि अध्यक्षमा चुनाव लड्न तयार भएनन् । 

महाधिवेशनमा प्रस्तुत चारवटा दस्तावेजमा छलफल गर्नका लागि १२ समूह बनाइएको थियो ।  १२ वटै समूहका टोली नेताले नेतृत्वमा सर्वसम्मत गर्नुपर्ने छलफलको निष्कर्ष प्रस्तुत गरेका थिए ।  समूहगत छलफलमा अध्यक्षमा नेपाल र महासचिवमा भुसालले नै निरन्तरता पाउनुपर्ने निष्कर्ष आएको सुनाएका थिए । 

“समूहगत छलफलमा सबै टोलीबाट नेतृत्व सर्वसम्मत हुनुपर्ने निष्कर्ष आएको थियो,” श्रेष्ठले बाह्रखरीसँग भने, “सबैको चाहनाले काम ग¥यो । प्रतिनिधिहरुको आग्रह स्वीकार गर्दै नेताहरु सहमत हुन तयार हुनुभयो ।”

भुसालले दस्तावेज पारित हुनुअघि नै अध्यक्षको दाबीबाट पछि हटेको प्रतिनिधिहरुको भनाइ छ । 

“उहाँले अध्यक्षको दाबी तीन दिनअघि नै छाड्नुभएको थियो । उहाँले अध्यक्ष बन्ने भन्दा पनि बार्गेनिङका लागि दाबी गरेको जस्तो देखियो,” एक नेता भन्छन् । 

अध्यक्ष नेपालले महासचिवमै दोहोरिन प्रस्ताव राखेपछि उनी सरकारात्मक बनेका थिए । भुसालले आफ्ना पक्षका नेताको व्यवस्थापन गर्न माग गरेका थिए ।  भुसालले बिहीबार दिउँसोसम्म आफू उपाध्यक्ष रहने र उपमहासचिव प्रकाश ज्वालालाई महसचिव बनाउनुपर्ने अडान लिएका थिए । 

महासचिवमा उपमहासचिव जगन्नाथ खतिवडाको दाबी थियो । 

उनले भुसालबाहेक अरुलाई महासचिव बनाउने विषयमा आफू सहमत नहुने अडान लिएका थिए । भुसाल बाहेक अरु महासचिव भए चुनाव नै हुनुपर्ने अडान उनको थियो ।  महासचिवमा नै रहन नेताहरुको दबाबपछि उनी तयार भएको बताइएको छ । 

त्यसो त, अधिकांश महाधिवेशन प्रतिनिधिहरुले  विद्रोह गरेको नेतृत्वको अनुमोदन हुनुपर्ने माग राखेका थिए । सोही अनुसार अनुमोदन भएको केन्द्रीय सदस्य सुदेश पराजुली बताउँछन्। 

“विद्रोह गरेको नेतृत्वको अनुमोदन गर्नुपर्ने हामीहरुको सुरुवातीदेखिकै अडान थियो । सोही अनुसार नेतृत्व अनुमोदन भएको छ,” उनी भन्छन् । 

रामकुमारीको असन्तुष्टि  

अध्यक्ष मण्डलका अध्यक्ष रहेका सम्मानित नेता खनालले सबै सर्वसम्मत हुने भनी हललाई गराएको जानकारीप्रति असन्तुष्टि देखिएको छ । अध्यक्ष र महासचिवबाहेक अरुमा सहमति नभएको भन्दै नेतृ रामकुमारी झाँक्रीले आपत्ति प्रकट गरेकी छन् । 

उनले पदाधिकारी र केन्द्रीय सदस्य खै ? भन्दै प्रश्न गरेकी छन् । 

“अध्यक्ष र महासचिवको सर्वसम्मत गर्न म समेतको प्रयास सफल भएको हो । तर अध्यक्ष मण्डलका अध्यक्ष झलनाथ खनाललाई पदाधिकारीदेखि केन्द्रीय सदस्यसम्म सर्वसम्मत गर्‍यौँ/भयो भनेर प्रतिनिधिहरूलाई घर पठाउने म्यान्डेट कसले दियो ? को पदाधिकारी ? को सदस्य खै त खनाल कमरेड ?,” उनको प्रश्न छ ।