काठमाडौं । बहुचर्चित नक्कली भुटानी शरणार्थी प्रकरणमा पूर्र्वगृहमन्त्री रामबहादुर थापाका फरार छोरा प्रतीक थापा र बेचन झा शुक्रबार एकसाथ पक्राउ परे । उनीहरू एकै ठाउँबाट पक्राउ परेका होइनन् । तर, संयोग उनीहरू एकसाथ पक्राउ गर्न प्रहरी सफल भयो ।

प्रहरीले थापालाई कपनबाट पक्राउ गरेको हो । झालाई भने प्रहरीको विशेष ब्युरोको टोलीले भारतबाटै पक्राउ गरी नेपाल ल्याएको प्र्रहरी उच्च स्रोतले बाह्रखरीलाई बतायो । थापालाई जिल्ला अदालत काठमाडौंले बुधबार पुर्पक्षका निम्ति थुनामा पठाउने आदेश गरेको छ ।

झाविरुद्ध भने जिल्ला प्रहरी परिसर काठमाडौंले किर्ते, राज्यविरुद्धको अपराध र संगठित अपराधमा थुनामा राखेर अनुसन्धान गर्न पहिलो पटक सात दिनको अनुमति पाएको थियो ।
 
दोस्रो पटक म्याद थपका लागि बिहीबार अदालत उपस्थित गराइने काठमाडौं प्रहरीका एसपी नवराज अधिकारीले जानकारी दिए ।  नक्कली भुटानी शरणार्थी प्रकरणमा प्रहरीको खोजी सूचीमा सबैभन्दा महत्वका साथ खोजिएका आरोपी हुन्, झा ।

तर, उनी पक्राउ गर्न प्रहरीलाई एक वर्षभन्दा बढी समय लाग्यो ।  २०७९ चैतदेखि उपत्यका अपराध अनुसन्धान कार्यालयको टोलीले पक्राउ गरेको थियो । 

नक्कली भुटानी शरणार्थी प्रकरणमा पूर्वगृहमन्त्री बालकृष्ण खाँण, एमाले सांसद टोपबहादुर रायमाझीदेखि बहालवाला सचिव टेकनारायण पाण्डे नै पक्राउ परेका थिए । जिल्ला अदालतले पक्राउ परेकामध्ये अधिकांशलाई पुर्पक्षका लागि थुनामा पठाउने आदेश गरेको थियो । गएको मंसिरमा उच्च अदालत पाटनले भने ६ जनालाई धरौटीमा छाड्ने आदेश गरेको थियो ।

न्यायाधीशद्वय प्रकाश खरेल र जनक पाण्डेको इजलासले पूर्वगृहमन्त्री बालकृष्ण खाँणका, उनकै स्वकीय सचिव नरेन्द्र केसी, हज समितिका अध्यक्ष शमशेर मियाँ, शरणार्थी नेता टेकनाथ रिजाल, टोपबहादुरका छोरा सन्दीप रायमाझी, हरिभक्त महर्जन र रामशरण केसीलाई थुनामुक्त गर्ने आदेश गरेको थियो ।

टोपबहादुर रायमाझीसहित नक्कली भुटानी प्रकरणका मुख्यआरोपी दाङका सन्देश शर्मा र सुनसरीका केशव दुलालसहितका १० आरोपी सचिव पाण्डे, पूर्वगृहमन्त्री रामबहादुर थापाका सुरक्षा विज्ञ डा. इन्द्रजित राई, सानु भण्डारी, सागर राई, गोविन्दकुमार चौधरी र पूर्वसांसद आङटावा शेर्पा भने पुर्पक्षका लागि थुनामै छन् ।

के थियो बेचन झाको कनेक्सन ?

अनुसन्धानका खटिएका प्रहरीका अनुसार, बेचन झाको सम्पर्क राजनीतिक दलका उपल्ला तहका नेताहरूसँग देखिएको थियो ।

त्यसबाहेक शरणार्थी प्रकरणमा पक्राउ परेर हाल उच्च अदालतको आदेशले छुटेका रामशरण केसीसँगसमेत उनको निकट सम्बन्ध देखिएको थियो । प्रहरीले केसीको साथबाट झाकै नामका काटिएको दुई करोडको चेक समेत बरामद गरेको थियो । 

पछि बयानमा समेत केसीले शरणार्थी प्रकरणमा राजनीतिक दलका नेताहरू मिलाउने जिम्मा झाले लिएको र सोही कारण चेक काटेको बयान दिएका थिए । झाले केसीसँग आफू भारतीय दूतावास नजिकको भनी परिचय दिएको खुलेको थियो । प्रहरी स्रोतका अनुसार, झाको नेपाली कांग्रेसका उच्च नेतासँग देखिएको छ ।

त्यसबाहेक सचिव टेकनारायण पाण्डेसँग पनि उनको सम्बन्ध खुलेको थियो । गिरोहका सदस्यहरूलाई गृहका अधिकारीसँग सम्बन्ध समेत उनैले बनाइदिएको प्रहरीको दाबी छ । गृहमन्त्री बालकृष्ण खाँण र सचिव पाण्डेलाई गिरोहसमक्ष भेट गराउने व्यक्ति नै झा रहेको अनुसन्धानमा खटिएका प्रहरीले बताउँदै आएका छन् ।

बयानमा बोल्दैनन् झा

भुटानी शरणार्थी प्रकरणको अनुसन्धानमा खटिएका प्रहरीलाई लागेको थियो, बेचन झा पक्राउ परेपछि अनुसन्धानको दायरा खुल्दै जानेछ । जसकारण प्रहरीले चलाखीपूर्वक त्यतिबेला बेचन झाको वतन नखुलेको भन्दै खुलेका बखत अनुसन्धान गर्ने गरी अनुसन्धान प्रतिवेदन बुझायो ।

त्यहीकारण प्रहरीले नक्कली भुटानी प्रकरणमा जोडिएका उनलाई थुनामा राखेर अनुसन्धान गर्ने अनुमति पाएको हो । तर, झा पक्राउ परेपनि झाबाट शरणार्थी प्रकरणको कुनै प्रमाण भने प्रहरी फेला पार्न सकेको छैन ।

झाले बोकेका दुई वटा मोवाइल फोन परीक्षण गर्न प्रहरीले डिजिटल फरेन्सिक ल्याबमा पठाएको छ ।  प्रहरीसँगको प्रारम्भिक बयानमा भने उनले नक्कली भुटानी शरणार्थी प्रकरणबारे आफू अनभिज्ञ रहेको भन्दै कुनै कुरा बताउन चाहेका छैनन् । 

राजनीतिक दलका नेताहरूसँगको सम्बन्धबारे भने उनले स्वीकार गरेछन् ।

अनुसन्धानमा संलग्न एक अधिकारीले भने, “नक्कली भुटानी शरणार्थीबारे केही जानकारी छैन भनी बेचन झा पन्छिन खोज्छन् । हामीले प्रारम्भिक सोधपुछका क्रममा धेरै प्रयाय ग¥यौँ । तर, केही खुल्लाजस्तो छैन ।”

नेताहरूसँगको सम्बन्धबारेसमेत उनले ५–६ वर्ष अघिबाट एक्लाएक्लै भेटघाट गर्न छाडेको बयान प्रहरीलाई दिएका छन् ।