काठमाडौं । नेपाल नम्बर एक एमेच्योर गल्फर सद्‌भाव आचार्य विशेष प्रशिक्षण तथा दुई प्रतियोगितामा सहभागी हुन बिहीबार अमेरिकातर्फ प्रस्थान गर्ने भएका छन् ।

सद्‌भावले १२४औँ संस्करणको यूएस एमेच्योर च्याम्पियनसिपको अन्तिम चरणको छनोट प्रतियोगितामा नेपालको प्रतिनिधित्व गर्नेछन् । १८ वर्षीय सद्‌भावले युनाइटेड स्टेट्स गल्फ संघबाट दोस्रो तथा फाइनल राउन्डको छनोट प्रतियोगिताका निम्ति विशेष निमन्त्रणा पाएका हुन् । उनले यो छनोट नर्थ क्यारोलिना वा क्यालिफोर्नियाबाट खेल्नेछन् ।

सद्‌भाव यूएस एमेच्योर च्याम्पियनसिपको अन्तिम छनोट प्रतियोगिता खेल्ने पहिलो नेपाली गल्फर समेत बन्नेछन् । १२४औँ यूएस एमेच्योर च्याम्पियनसिप आउँदो अगस्ट १२ देखि १८ सम्म मिनेसोटास्थित हेजेल्टाइन नेसनल गल्फ क्लबको चास्का टाउन कोर्समा हुनेछ ।

यसैगरी, उनले जुनियर प्लेयर्स च्याम्पियनसिप २०२४ मा सहभागिता जनाउनेछन् । अमेरिकन जुनियर गल्फ संघले सद्‌भावलाई अगस्ट २९ देखि सेप्टेम्बर १ सम्म फ्लोरिडास्थित टीपीएस सग्रसको दी प्लेयर्स स्टेडियम कोर्समा आयोजना हुने च्याम्पियनसिपमा प्रतिस्पर्धा गर्न निमन्त्रणा दिएपछि उनी सहभागी हुन लागेका हुन् ।

सन् २०२४ को जुनियर प्रेसिडेन्ट्स कप इन्टरनेसनल टिमको दाबेदारमध्येको एक खेलाडी भएकाले अमेरिकन जुनियर गल्फ संघले सद्‌भावलाई निमन्त्रणा गरेको नेपाल गल्फ संघले जनाएको छ ।

दुई प्रतियोगितामा सहभागितासँगै अमेरिकामा सद्‌भावले विशेष प्रशिक्षण गर्नेछन् । उनले विभिन्न गल्फ क्लबमा प्रोफेसनल गल्फर स्टेफन पर्यासँग तीन महिना प्रशिक्षण लिनेछन् ।

दुईपटक फाल्डो सिरिज एसिया फाइनलमा छनोट हुनुका साथै सद्‌भावले गत वर्ष सुवास तामाङसँग मिलेर बंगलादेश ओपनमा टिम इभेन्टमा नेपाललाई स्वर्णपदक दिलाएका थिए । उनी सूर्य नेपाल गल्फ टुरमा सबैभन्दा कम उमेरमा उपाधि जित्ने गल्फर पनि हुन् । उनले तीन प्रमुख उपाधि जितिसकेका छन् । सद्‌भावले गत वर्ष चीनमा सम्पन्न १९औँ एसियाली खेलकुदमा पनि देशको प्रतिनिधित्व गरेका थिए ।

सद्‌भावले हालै सम्पन्न सूर्य नेपाल गल्फ टुर २०२३–२४ को सिजनमा दुई उपाधि जितेका थिए । त्योसँगै उक्त टुरमा उनको कुल उपाधि संख्या तीन पुगेको छ । यो सिजन ६ प्रतियोगितामा भाग लिएका उनले दुई प्रमुखसँगै एमेच्योरतर्फ ६ उपाधि नै जिते ।

राष्ट्रिय खेलकुद परिषद्का सदस्यसचिव टंकलाल घिसिङले बिहीबारै सद्‌भावलाई सफलताको शुभकामना दिँदै एक कार्यक्रमबीच बिदाइ गरे । सदस्यसचिव घिसिङले नेपाली खेलाडीले यो स्तरको प्रतियोगिता र प्रशिक्षणमा सहभागी हुनु गल्फका निम्ति मात्र नभई सिंगो राष्ट्रलाई गर्वको विषय भएको बताए ।