काठमाडौं । राष्ट्रिय खेलकुद परिषद् (राखेप)का सदस्य–सचिव टंकलाल घिसिङले खेलाडीलाई हौसला दिन नेपाल खेलकुद पत्रकार मञ्च (एनएसजेएफ)सँग सहकार्य गर्न तयार रहेको बताएका छन् ।

विश्व खेलकुद पत्रकार दिवसका अवसरमा आयोजित 'ओलम्पिकमा नेपालको सहभागिता' विषयमा भएको अन्तर्क्रिया कार्यक्रममा सदस्य–सचिव घिसिङले खेल पत्रकारले प्रोफाइल तथा स्टोरीमार्फत खेलाडीहरूलाई सहयोग गर्नुपर्ने बताए । खेलाडीभित्रको प्रतिभालाई सञ्चारकर्मीले मात्र उजागर गर्न सक्ने उनको भनाइ छ ।

खेलकुद विश्वविद्यालयका लागि परिषद्ले अध्ययन प्रतिवेदन मन्त्रालयमा पेस गरिसकेको जनाउँदै उनले हालकै विश्वविद्यालयले खेलकुद फ्याकल्टीमार्फत अध्यापनको व्यवस्था गर्नु उचित हुने धारणा राखे ।

मञ्चका कार्यवाहक अध्यक्ष निरन्जन अधिकारीको अध्यक्षतामा भएको कार्यक्रममा ओलम्पिक कमिटीका महासचिव निलेन्द्रराज श्रेष्ठ, ओलम्पियन दिपक विष्ट, खेलकुद पत्रकार मञ्चका पूर्वअध्यक्षहरू अजय फुयाल र महेश आचार्यले ओलम्पिकमा नेपालको सहभागिता सम्बन्धमा अनुभव राखेका थिए ।