काठमाडौं । अभिनेता विराज भट्टको निर्देशनमा निर्माण भइरहेको चलचित्र ‘१२ गाउँ’को फर्स्टलुक पोस्टर सार्वजनिक भएको छ । सार्वजनिक पोस्टरमा समीर भट्टमात्र फिचर्ड छन् । 

समीरलाई एक्सन अवतारमा प्रस्तुत गरिएको छ । हातमा खुकुरी र छुरा बोकेर दौडिरहेका उनी एक्सन भूमिकामा रहेको पोस्टरले संकेत गरेको छ । कालो लेदरको ज्याकेट लगाएका समीरले कालै टिसर्ट र कालै कलरको बक्स पाइन्ट लगाएका छन् । लामो– लामो कपाल र दारीमा देखिएका उनको अनुहारको एक्सप्रेसनले उनी रिभेन्जको मुडमा रहेको देखिन्छ ।

दसैँमा प्रदर्शनमा आउने चलचित्रबाट अभिनेता विराज भट्टका छोरा समीर भट्टले नेपाली रजतपटमा डेव्यु गर्दैछन् । 

विराजले नेपाली सिनेमा इतिहासकै उच्चस्तरीय एक्सन चलचित्र बनाउने बताइरहेका छन् । यो चलचित्रले नेपाली सिनेमाको एक्सनलाई अन्तर्राष्ट्रिय स्तरमा लैजाने विश्वास निर्देशक तथा अभिनेता भट्टको छ ।

निर्देशक विराजका अनुसार अबको १० दिनमा सिनेमाको छायांकन प्याकअप हुनेछ । यो सिनेमामा समावेश गरिने एउटा एक्सन दृश्यको छायांकन भारतको मुम्बईमा गर्नु पर्ने भएकाले अबको १० दिनमा सम्पूर्ण छायांकन सकिने उनको भनाइ छ ।

समिरले १० वर्षदेखि भारतको मुम्बईमा अभिनय, मार्सल आर्ट, जिम तथा जिम्न्यास्टिकको प्रशिक्षण लिएर डेब्यू गरेका हुन् । समीरले मुम्बईमा किशोर–नमितबाट अभिनय प्रशिक्षण लिएका थिए ।

यो चलचित्रबाट दुई अभिनेत्री पूर्वमिस नेपाल इन्टरनेसनल न्यान्सी खड्का र मोडल सनिशा भट्टराईले पनि डेव्यु गर्दैछन् । 

चलचित्रमा विराज, समीर, न्यान्सी र सनिशासँगे मुरलीधर, कनिज कोइराला, नरेन खड्का, दीया मास्के, कृष्ण भट्टलगायतको अभिनय रहनेछ ।