काठमाडौं । राष्ट्रिय स्वतन्त्र पार्टी (रास्वपा)ले सहकारी प्रकरणमा अनुसन्धान भइरहेको विषयलाई पार्टीले प्रभावित पार्न नखोजेको बताएको छ । मंगलबार काठमाडौंमा पत्रकार सम्मेलन गरेर रास्वपाले पार्टी सभापति रवि लामिछानेलाई राजनीतिक पूर्वाग्रहका आधारमा थुनामा राख्ने कामको विरोध गरेको तर सहकारी प्रकरणमा अनुसन्धान भइरहेको विषयलाई प्रभावित पार्न नखोजेको बताएको हो ।

पत्रकार सममेलनमा रास्वपाका कार्यवाहक प्रवक्ता मनिष झाले लामिछानेविरुद्ध राज्यले नै हुँदै नभएको कुरा बाहिर ल्याएको र एकपक्षीय ढंगले दोष थुपार्ने काम भएको जिकिर गरे ।

उनले प्रयाप्त प्रमाण भए पनि कोसीका पूर्वमन्त्री लिलाबल्लभ अधिकारीमाथि कानुनी कारबाही नभएको तर प्रमाण नभएका व्यक्तिलाई थुनामा राख्ने काम राजनीति प्रतिशोध नै भएको बताए ।

झाले कुनै पनि चेकमा हस्ताक्षर गर्दैमा संलग्नता पुष्टि नहुने बताउँदै यसलाई पुष्टि गर्ने थप कागजात आउनुपर्ने बताए । उनले चेकका विषयमा अनावश्यक बहस गरेर अतिरञ्जित गर्ने काम नगर्न आग्रह गरे ।

पत्रकार सम्मेलनमा रास्वपाका नेताहरूले आफूलाई मनमा लागेको कुरा सामाजिक सञ्जालमार्फत अभिव्यक्त गर्दा कारबाही हुन्छ भने भोग्न समेत तयार रहेको बताएका छन् ।