वासिंटन । गएको बिहीबार राति (नेपालमा शुक्रबार बिहान) अमेरिकाको राष्ट्रपतीय निर्वाचनको लागि भएको बहसमा कमजोर प्रस्तुति भएपछि राष्ट्रपति जो बाइडेनलाई आफ्नो उमेदवारीबाट फिर्ता हुन दबाब पर्न थालेको छ ।

अमेरिकामा अहिले उनले फिर्ता हुन चाहेमा के हुन्छ, फिर्ता भएमा अर्को दाबेदार डेमोक्रयाटिक पार्टीबाट को हुने र उनलाई हटाउनुपर्‍यो भने कसको सम्भावना हुन्छ जस्ता प्रश्नहरू उठ्न थालेका छन् । 

उनको प्रस्तुतिमा विपक्षी रिपब्लिकनका उमेदवार डोनाल्ड ट्रम्पभन्दा कमजोर रहेको कुरामा सो पार्टीका अधिकांशले सहमति जनाएको अवस्था छ । यसबारेमा स्वयं राष्ट्रपति बाइडेनले पनि महसुस गरेको पाइएको छ ।

उनले बहसको भोलिपल्ट नर्थ क्यारोलिनामा आयोजित एक कार्यक्रममा बोल्दे आफू भर्खरको मान्छे नभएको आफूलाई थाहा भएको, जसरी हिँड्नुपर्ने हो त्यसरी हिँड्न सक्ने अवस्थामा नभएको, बोलीको बारेमा पनि थाहा भएको र बहस जस्तो हुनुपर्ने त्यस्तो नभएपनि के गर्ने, सत्य कसरी बोल्ने, गलतबाट सत्य के हो त्यो भन्न सक्ने र राष्ट्रपतिको काम कसरी गर्ने भन्ने बारेमा आफूलाई थाहा भएको बताएका छन् । उनले कसरी काम गर्ने र कैयौँ मिलियन्स अमेरिकीलाई थाहा भएको कुरा आफूलाई पनि थाहा भएको जनाएका छन् । 

उनको बिहीबारको बहसको प्रस्तुतिलाई लिएर समर्थक, दाता तथा डेमोक्रयाटिक कंग्रेस सदस्यहरूले दुख प्रकट गरिरहेको बेलामासो धारणा राखेका हुन् ।

बाइडेन राष्ट्रपतिको दौडबाट पछि हट्न सक्ने सम्भावना छ भन्ने प्रश्नमा उनको क्याम्पेनका प्रवक्ता सेथ स्कुस्टरले भनेका छन्– ‘छैन ।’  ‘यसका लागि कुनै आधार छैन’ बाइडेनका सल्लाहकारले पनि शुक्रबार बिहान भनेका छन् ।

क्याम्पेनका सहअध्यक्ष मिच लान्ड्रियुले पनि शुक्रबार राति सीएनएनसँग कुरा गर्दै भनेका छन् ‘जो बाइडेनमा १०० प्रतिशत आत्मविश्वास छ ।’

आउँदो अगस्टमा डेमोक्र्याटिक पार्टीको सम्मेलन शिकागोमा हुँदै छ । सो सम्मेलनले पुनर्विचार गर्न सक्ने सम्भावना रहे पनि यसअघि प्राइमरीमा बाइडेन ९९ प्रतिशत मत पाएर उमेदवार छानिएकोले ती प्रतिनिधिलाई अहिले फिर्ता गर्न अप्ठेरो रहेको बताइएको छ ।

उनले छोड्ने अवस्थामा उपराष्ट्रपति कमला ह्यारिसपनि सो पदका उमेदवार छानिन सक्ने जनाइएको छ । कतिपयले क्यालिफोर्नियाका गभर्नर गाभिन न्यूसमको नाम पनि लिएका छन् । यद्यपि, उनले सिधैँ ट्रम्पको विरोध गर्न चाहेको पाइएको छैन । उपराष्ट्रपति ह्यारिसले भने बहसको प्रतिक्रियामा सुरुमा ‘स्लो’ र अन्तिममा ‘स्ट्रोङ’ प्रस्तुती भएको टिप्पणी गरेकी थिइन् ।

बाइडेनले छोड्ने अवस्था आएमा उपराष्ट्रपति ह्यारिस तयारी अवस्थामा रहेको यूएसए टुृडेले आफ्नो एक स्टोरीमा जनाएको छ । उता डेमोक्रेटिकबाट मिनेसोटाका रिप्रेजेन्टेटिभ डीन फिलिप्स र लेखक मैरियाना विलिइम्सनको नामपनि चर्चामा रहेको छ । यद्यपि, अहिलेका उमेदवारले छोडेमा वा उनलाई हटाइएमा मात्र अरु छनोट गर्ने कुरा आउँछ । अहिलेसम्म सबै अन्योलमा रहेको अवस्था छ ।

आगामी अगस्ट १९ देखि २२ सम्म शिकागोमा हुने डेमोक्रेटिक नेसनल कन्भेन्सनले सो पार्टीको उमेदवारको आधिकारिक घोषणा गर्नेछ । एजेन्सीको सहयोगमा