काठमाडौं । नेपाली कथानक चलचित्र ‘घरज्वाइँ’को ट्रेलर सार्वजनिक भएको छ । काठमाडौंमा आज एक कार्यक्रमको आयोजना गर्दै दयाहाङ राई र मिरुना मगर अभिनीत ‘घरज्वाइँ’को ट्रेलर सार्वजनिक गरिएको हो । 

ट्रेलरमा युवायुवतीबीचको आकर्षण, प्रेम, सर्त, बाध्यता र अर्काको परिवार रिझाउन नसक्दाको कथा समेटिएको छ । एकले अर्काको परिवारलाई सहजै स्वीकार्न नसक्दाको द्वन्द्व ट्रेलरमा देख्न सकिन्छ । 

अनिल बुढामगर सिनेमाका निर्देशक हुन् । सिनेमा असार २८ गते रिलिज हुँदै छ । सिनेमाका निर्माता जनक घर्ती मगर हुन् । 

पूर्वी रुकुम आसपासमा छायांकन गरिएको चलचित्रको कथा पनि निर्देशक अनिल आफैँले लेखेका हुन् । उनलाई पटकथा तथा संवाद लेखनमा बिनोद खतिवडा र सुभाष कोइरालाले सघाएका छन् । 

‘घरज्वाइँ’मा दयाहाङ र मिरुनासँगै बुद्धि तामाङ, पुष्कर गुरुङ, शिशिर बाङ्देल, भोलाराज सापकोटा, खड्गबहादुर पुन, राज थापा, कविता आले, शिला आले, अनु थापा, बिना थापा मगर, सोनाम लामा, बिबेश बुढा मगर, सुनिल मगरको अभिनय छ ।

सिनेमालाई सुसन प्रजापतिले खिचेका छन् ।