काठमाडौं । नेपाली चलचित्र ‘आचार्य’को प्रदर्शनमा रोक लगाइएको छ । रिलिजमा आएको एक हप्तापछि सिनेमाको प्रदर्शनमा रोक लगाइएको हो । 

रि–लिज गर्दा पनि पुनः सेन्सर गर्नुपर्ने प्रावधान रहेकोमा ‘आचार्य’ निर्माण टिमले उक्त प्रक्रिया पूरा नगरेपछि प्रदर्शनमा रोक लगाइएको हो । 

“एकपटक सेन्सर गरेको चलचित्र दश वर्षसम्म सार्वजनिक प्रदर्शन गर्न पाइन्छ । त्यसपछि प्रदर्शन गर्नुपरे पुनः सेन्सर गर्नुपर्छ,” चलचित्र विकास बोर्डका प्रवक्ता केएल बुढाथोकी भन्छन्, “आचार्यमा भक्तराज आचार्यको मृत्युपछिका दृश्य पनि राखेको देखियो । दृश्य थपघट गरेपछि पनि पुनः सेन्सर गराउनुपर्छ ।” 

गायक तथा संगीतकार भक्तराज आचार्यको जीवन संघर्ष र उपलब्धीमा बनेको चलचित्र ‘आचार्य’ १३ वर्षपछि गत शुक्रबारबाट पुनः रिलिज भएको थियो । 

प्रशान्त रसाइलीले निर्देशन गरेको सिनेमा भक्तराजका जेठा छोरा सत्यराज आचार्य मुख्य भूमिकामा छन् । 

अन्य कलाकारमा सुनील पोखरेल, अरुणा कार्की, सौगात मल्ल, विपीन कार्कीलगायत छन् ।