काठमाडौं । चलचित्र ‘कल्की २८९८ एडी’ प्रदर्शनमा आएको छ । दक्षिण भारतीय अभिनेता प्रभास अभिनित चलचित्र ‘कल्की २८९८ एडी’ आजबाट प्रदर्शनमा आएको छ । 

नाग अश्विनले निर्देशन गरेको चलचित्रमा प्रभास, अमिताभ बच्चन, दीपिका पादुकोण र कमल हासन मुख्य भूमिकामा छन् । ‘कल्की २८९८ एडी’मा ६०० करोड भारू (सात अर्ब २० करोड नेपाली रुपैयाँ) लगानी छ । 

सात अर्ब २० करोड रुपैयाँमा कति नेपाली चलचित्र बन्छन् ? 
नेपालमा कोभिडपछि चलचित्र बन्नेक्रम घटेको छ । गत वर्ष ५३ वटा चलचित्र बनेका थिए । यो वर्ष पनि गत वर्षभन्दा धेरै चलचित्र बन्ने सम्भावना देखिएको छैन । 

नेपालमा एउटा चलचित्र निर्माणका लागि औसतमा दुई करोड रुपैयाँ बजेट लाग्छ । वर्षमा करिब ५० वटा चलचित्र बन्छन् भनेर हिसाब गर्ने हो भने नेपाली चलचित्रमा वार्षिक एक अर्ब (सय करोड नेपाली रुपैयाँ) लगानी भइरहेको छ । सात अर्ब २० करोड रुपैयाँमा ३६० वटा नेपाली चलचित्र बन्छन् । ‘कल्की २८९८ एडी’को बजेट सात वर्ष चार महिना नेपाली चलचित्र उद्योगमा बन्ने सिनेमाको लगानी हो ।