काठमाडौं । चलचित्र ‘दान्भी’ गत शुक्रबार रिलिज भएको हो । चलचित्रमा पूजा शर्मा मुख्य भूमिकामा छिन् । 

रिलिज भएको दिन शुक्रबार र शनिबार केही हलमा राम्रै व्यापार गरेको यो चलचित्र अहिले भने बक्सअफिसमा कमजोर देखिएको छ ।

मंगलबार (भोलि)का लागि काठमाडौं उपत्यकामा देशकै ठूलो मल्टिप्लेक्स चेनले यो चलचित्रलाई ६ वटा शो दिएको छ । भाटभटेनी भक्तपुरको क्यूएफएक्समा दुई, छाया सेन्टरमा एक, सिभिल महलमा दुई र लाभिममा क्यूएफएक्सले एक शो दिएको छ ।  

सोमबार अपराह्न ५ बजेसम्म क्यूएफएक्सले दिएका ‘शो’मा पनि ‘दान्भी’को अग्रिम टिकट बुकिङ देखिएको छैन ।  

काठमाडौंका ६ वटा ‘शो’मा सिभिल महलको साढे ५ बजेको ‘शो’मा पाँच वटा टिकटमात्र बुकिङ भएको छ । यसले यो चलचित्रको बक्सअफिस कमजोर भएको पुष्टि गरेको छ । 

रुपेश तामाङको निर्देशन रहेको ‘दान्भी’मा पूजासँगै कुन्साङ बम्जन, किरण श्रेष्ठ, मोनालिसा खतिवडा, राजाराम पौडेल, कालु राणा, सीता तामाङलगायत कलाकारको पनि अभिनय छ । 

‘दान्भी’लाई शुक्रबार क्यूएफएक्सले काठमाडौंमा १६ र उपत्यकाबाहिर ३१ शो प्रदान गरेको थियो । 

दोस्रो ठूलो मल्टिप्लेक्स आईएनआईले १२, वान सिनेमाजले सात शो उपलब्ध गराएका थिए । एफक्युब, बीएसआर, बिग मुभिज रन्जनालगायत मल्टिप्लेक्समा पनि ‘दान्भी’ले उत्साहजनक शो पाएको थियो । उत्साहजनक शो पाए पनि यो चलचित्रले राम्रो व्यापार गर्न सकेन ।