काठमाडौं । चलचित्र विकास बोर्डको आयोजनामा सुदूरपश्चिम प्रदेशको धनगढीमा राष्ट्रिय बालचलचित्र महोत्सव–२०८१ सम्पन्न भएको छ । शुक्रबारदेखि सुरु भएको महोत्सव आइतबार सम्पन्न भएको हो । 

महोत्सवमा एक दर्जनभन्दा बढी बाल चलचित्रहरू प्रदर्शन गरिएको थियो । चलचित्र विकास बोर्डले प्रशिक्षित गरेका बालबालिकाहरुद्वारा निर्माण गरिएका चलचित्रहरू पनि महोत्सव प्रदर्शन गरिएको थियो ।

महोत्सव संयोजक तथा बोर्ड प्रवक्ता केएल बुढाथोकीका अनुसार  बोर्ड अध्यक्ष भुवन केसीले ‘बालबालिकासँग भुवन केसी’ कार्यक्रममा आफ्नो चलचित्र यात्राबारे बालबालिकासँग संवाद तथा अन्तरक्रिया गरेका थिए । 

महोत्सवकै क्रममा चलचित्र निर्माण कार्यशाला ‘मेरो कथा मेरो चलचित्र’ सुरु गरिएको थियो । कार्यशालामा २१ बालबालिकाले प्रशिक्षण लिएका थिए । 

चलचित्रसम्बन्धी फोटो प्रदर्शनी महोत्सवको आकर्षणको रूपमा रहेको बोर्डले जारी गरेको प्रेस नोटमा छन् । 

बोर्डले गत वर्ष दाङमा प्रहिलो बालचलचित्र महोत्सव आयोजना गरेको थियो ।