काठमाडौं । जावलाखेलमा बेहोस अवस्थामा भेटिएका एक दम्पतीको मृत्यु भएको छ । उनहरूको हिजो राति साढे ९ बजे मृत्यु भएको जिल्ला प्रहरी कार्यालय ललितपुरले जनाएको छ । 

मृत्यु हुनेमा सिन्धुपाल्चोक घर भई हाल ललितपुरको जावलाखेल बस्दै आएका २५ वर्षीय उमेश सेन्चुरी र उनकी श्रीमती २५ वर्षकै रेणु सेन्चुरी रहेको जिल्ला प्रहरी कार्यालय ललितपुरका एसपी नरेश सुवेदीले जानकारी दिए । 

“बेहोस अवस्थामा फेला परेका उनीहरूलाई उपचारका लागि पाटन अस्पताल पुर्याइएको थियो । त्यहीँ उनीहरूलाई चिकित्सकले मृत घोषणा गरेका हुन्,” एसपी सुवेदीले बाह्रखरीसँग भने, “अहिले पोस्टमार्टमका लागि शव शिक्षण अस्पतालमा राखिएको छ ।” 

उमेश र रेणु बेहोस रहेको अवस्थामा कोठामा पुग्दा उनीहरू नजिकै झोलिलो पदार्थ रहेको बोतल भेटिएको एसपी सुवेदीले जानकारी दिए ।

“मृत्यु शंकास्पद देखिँदैन । तर नजिकै झोलिलो पदार्थ भएको बोतल भेटिएको छ,” उनले भने, “त्यो केको बोतल हो पोस्टमार्टम रिपोर्ट आएपछि थाहा हुनेछ ।” 

उमेश र रेणुले विवाह गरेको ११ वर्ष भएको बताइएको छ । उनीहरूबारे थप जानकारी आउन बाँकी छ ।