काठमाडौं । विद्यालय शिक्षालाई नियमन गर्न नयाँ शिक्षा ऐन बन्ने क्रममा छ । विद्यालय शिक्षासम्बन्धी कानुनलाई संशोधन र एकीकरण गर्न बनेको विधेयकमा संसद्को शिक्षा स्वास्थ्य तथा सूचना प्रविधि समितिमा दफावार छलफल भइरहेको छ ।

समग्र विद्यालय शिक्षा र यसमा आबद्ध शिक्षक–कर्मचारीमात्र होइन, शिक्षा क्षेत्रमा सरोकार राख्ने सबै ऐनको तीव्र पर्खाइमा छन् । तर, शिक्षा विज्ञान तथा प्रविधिमन्त्री सुमना श्रेष्ठ ऐन कहिले आउँछ भन्ने विषय आफ्नो हातमा नरहेको बताएकी छन् ।

मंगलबार मन्त्रालयमा आफ्नो १०० दिने कार्यकालका उपलब्धि सार्वजनिक गर्ने क्रममा मन्त्री श्रेष्ठले सञ्चारकर्मीहरूसँग भनिन्, “सबैले सोध्नुहुन्छ, विद्यालय शिक्षा ऐन कहिले आउँछ ? वास्तवमा यो मेरो हातमा छैन ।”

अहिले विधेयक समितिमा दफावार छलफलको क्रममा रहेको र प्रदेशस्तरमा समेत छलफलमा लैजानुपर्ने भएकाले तत्काल जारी नहुने उनको आशय थियो ।

“संसदीय समितिमा छलफल भएर उहाँहरू कहिले प्रदेशस्तरमा जानुहुन्छ, त्यसमा निर्भर गर्छ, जिम्मेवार बढी हुँदाहुँदै मैले हस्तक्षेप गर्न मिल्दैन,” मन्त्री श्रेष्ठले प्रस्ट पारिन् ।

१६३ वटा दफा रहेको विधेयकमा एकहजार ७०० बढी संशोधन प्रस्ताव परेको समितिले जनाएको छ ।