काठमाडौं । नेपाली कथानक चलचित्र ‘देवी’ तिजको छेको पारेर रिलिज हुने भएको छ । चलचित्र भदौ २१ गते रिलिज हुने भएको हो । 

शिल्पा मास्केको मुख्य भूमिका रहेको चलचित्रले यौनहिंसाविरुद्धको कथावस्तु समेट्नेछ । सिनेमाको पोस्टरमा शिल्पा मास्केलाई क्यारेक्टर लुक्समा प्रस्तुत गरिएको छ ।

सञ्जोग राईले निर्देशन गरेको चलचित्र क्राइम थ्रिलर जानरामा छ । निर्देशक राईले महिलामाथि हुने यौनहिंसाविरुद्धको कथामा सिनेमा बनाएको बताएका छन् । 

व्यावसायिकभन्दा पनि इमान्दार भएर कथा भन्ने प्रयास गरेको उनको भनाइ छ । एक अपरिचित पात्रले धमाधम बलात्कारीको हत्या गरेपछि यो हत्या सही वा गलत भन्ने प्रश्न चलचित्रले उठान गर्ने प्रयास गरेको निर्देशक राईले बताएका छन् ।

बलात्कारविरुद्धको नेपालको कानुन थप कठोर हुनुपर्छ भन्ने आवाज सिनेमाले उठान गरेको छ । 

चलचित्रमा शिल्पाले पत्रकार, गौरव पहारीले अपराध अनुसन्धान गर्ने प्रहरी र नाजिर हुसेनले एक संस्था सञ्चालकको भूमिका निर्वाह गरेका बताइएको छ । चलचित्रमा अभिनेता टीका पहारीले पनि अभिनय देख्न सकिनेछ । 

रेमन गुरुङ, नारायण राई र सञ्जोग राईको निर्माण रहेको चलचित्रका कार्यकारी निर्माता जावेद खान तथा सह–निर्माता उजेन नोर्वे गुरुङ र मिलन लामा हुन् ।

चलचित्रको पटकथामा निर्देशक राईलाई अजय गौतमले सघाएका छन् । रामबाबु गुरुङको बाँसुरी फिल्म्सले चलचित्रलाई प्रदर्शनमा सघाउने भएको छ ।