काठमाडौं । नेपाली कथानक चलचित्र ‘बाटोः रोड टु डेथ’ आजबाट प्रदर्शनमा आएको छ । 

नेपाली, तमिल, तेलुगु र हिन्दी गरी चार भाषामा बनेको चलचित्रका लेखक, सम्पादक तथा निर्देशक मदन थापा हुन् । 

नेपाली चलचित्रको गुणस्तरलाई अन्तर्राष्ट्रियस्तरको बनाउने प्रयास आफूले गरेको निर्देशक थापाले बताएका छन् ।  

चलचित्रमा मिथिला शर्मा, सुलक्षण भारती, रक्षा थापा, उत्पल झा, पशुपति राई, किरण शाही, गणेश उपाध्याय, आभास अधिकारी, राजेन थापा, विजय आनन्द ताम्राकार, आशान्त शर्मालगायत कलाकारको अभिनय छ । 

चलचित्रमा के छ ? 
निर्देशक थापाका अनुसार यो चलचित्र एक दिनको यात्रामा घट्ने घटनाको कथा हो । एक दिनको यात्रामा पात्रले आफ्नो उद्देश्य पूरा गर्न के–के गर्छ, त्यसकै सेरोफेरोमा चलचित्रको कथा घुम्ने निर्देशक थापा बताउँछन् । 

“यो चलचित्र एक दिनको सफरको कथा हो । काठमाडौंबाट धरानसम्मको यात्राका क्रममा घट्ने घटनालाई मैले चलचित्रमा समेटेको छु,” निर्देशक थापा बाह्रखरीसँग भन्छन्, “यात्रामा रहेका पात्रको लक्ष्य के छ । र, त्यो लक्ष्य प्राप्त गर्न के–के सम्म गर्छन् भन्ने चलचित्रको कथा हो ।” 

एक्सन, थ्रिल, सस्पेन्सलगायत सबै पक्ष चलचित्रमा समेटिएको उनको भनाइ छ । नेपाली दर्शकलाई थ्रिलर मुभी हेर्नुपरे साउथ इन्डियन सिनेमा हेर्ने गरेको भन्दै नेपाली चलचित्रमै त्यो ‘टेस्ट’ आफूले दिने प्रयास गरेको उनले जानकारी दिए । 

चलचित्रको अधिकांश छायांकन काठमाडौं र गाइघाटमा भएको छ । चार करोड लगानी रहेको चलचित्र ओटीटीका लागि पनि लक्षित गरेर बनाएको निर्देशक थापा बताउँछन् । नेट्फ्ल्क्सिका लागि आफूले प्रयास गरिरहेको उनले बताएका छन् ।