काठमाडौं । केही समययता भरिभराउ हुन थालेका नेपाली सिनेमा घर पुनः रित्तिन थालेका छन् । प्रदीप भट्टराईको लेखन तथा निर्देशन रहेको चलचित्र ‘महाजात्रा’ रिलिज भएयता नेपाली चलचित्रको बक्सअफिस उत्साहजनक थियो ।  

‘महाजात्रा’ चैत ९ गते रिलिज भएको थियो । यो चलचित्रले  सोचेभन्दा धेरै ग्रसकलेक्सन गरेको थियो । चैत ३० मा ‘डिग्री माइला’ रिलिज भयो । अपेक्षित कलेक्सन गर्न नसके पनि यो चलचित्रले पाँच करोडको आंकडा कटाएको थियो ।

वैशाख १४ गते ‘बोक्सीको घर’ रिलिज भयो । यसले अनपेक्षित कलेक्सन गयो । दश करोडको आंकडा पार गर्न सफल भयो । वैशाख २१ मा ‘मनसरा’ आयो । यसले पनि ‘डिग्री माइला’ले जस्तै हाइप र ब्रान्डको अनुपातमा नकमाए पनि राम्रै कलेक्सन गरेको थियो । 

जेठ १० गते ‘फर्की फर्की’ र ‘पुजार सार्की’ रिलिज भए । यी चलचित्रले पनि राम्रो कलेक्सन गरिरहेका छन् । 

यसपछि गत साता रिलिज भएका चलचित्र ‘गाउँ आएको बाटो’ र ‘लन्डन टु पेरिस’ले दर्शक हलसम्म तान्न सकेनन् । यी चलचित्र हेर्न ठूलो संख्यामा दर्शक हल पुगेनन् । बिदाको दिनबाहेक हलमा धेरै अकुपेन्सी देखिएन । 

जसका कारण गत चैतदेखि नेपाली सिनेमाको बक्सअफिसमा देखिएको निरन्तरता टिक्न सकेन ।