काठमाडौं । वेब सिरिज ‘साहु बा’को टिजर सार्वजनिक गरिएको छ । काठमाडौंमा सोमाबार एक कार्यक्रम गर्दै सिरिजको टिजर सार्वजनिक गरिएको हो । एपी वान टेलिभिजन र म्युजिक नेपालद्वारा सञ्चालित ओटीटी प्लेटफर्म ‘मोःमो म्युजिक एन्ड मुभिज’ एपमा रिलिज हुनेछ ।

सिरिजमा अभिनेत्री प्रियंका कार्की, कविता नेपाली, विजु पार्की, नम्रता श्रेष्ठ, छुल्ठिम गुरुङलगायत कलाकारको अभिनय छ । 

अभिनेत्री कार्कीले सिरिजका लागि आफूले तीन वर्षभन्दा बढी समय दिएको बताइन् । 

२४ भाग रहेको सिरिजमा ३५० भन्दा बढी कलाकारले काम गरेको निर्माणपक्षले जनाएको छ । प्रत्येक भाग एक घण्टा लामो रहेको बताइएको छ । 

वेब सिरिजलाई सुजय योङले निर्देशन गरेका हुन् । उनको यो नेपाली डेव्यु सिरिज हो । सिरिजको कथा, पटकथा तथा संवाद पनि निर्देशक योङले नै लेखेका हुन् ।