काठमाडौं । अग्रता जोगाउन नसक्दा इंग्लिस प्रिमियर लिगमा लिभरपुल एस्टोन भिल्लाविरुद्ध ३–३ को बराबरीमा रोकिएको छ । सोमबार राति भिल्ला पार्कमा लिभरपुलले दुईपटक अग्रता बनाए पनि कायम राख्न नसकेको हो ।

खेलको दोस्रो मिनेटमा घरेलु टिमका गोलकिपर इमिलियानो मार्टिनेजबाट आत्मघाती गोल भएपछि पाहुना टिम १–० ले अगाडि थियो । तर, लिभरपुलको यो अग्रता लामो समय टिक्न सकेन । १२औँ मिनेटमा यौरी टाइलेमान्सले गोल गर्दै घरेलु टिमलाई खेलमा फर्काएका थिए ।

२३औँ मिनेटमा कोडी गाक्पोले गोल गरेपछि लिभरपुलले पहिलो हाफमा २–१ को अग्रता बनाएको थियो । दोस्रो हाफको सुरुआतमै जारेल अमोरिन क्वान्साहले गोल गर्दा लिभरपुलको अग्रता ३–१ मा पुग्यो । तर, अन्तिम पाँच मिनेट सम्हालिन नसक्दा लिभरपुल अंक बाँड्न बाध्य बन्यो ।

खेलको ८५औँ मिनेटमा झोन डरेनले गोल गर्दै घरेलु टिमलाई ३–२ को अवस्थामा फर्काएका थिए । त्यसको तीन मिनेटपछि डरेनले नै गोल गरेपछि खेल बराबरीमा टुंगियो ।

बराबरीपछि लिभरपुल ३७ खेलबाट ७९ अंकसहित तालिकाको तेस्रो स्थानमा छ । समान खेलबाट ६८ अंकको भिल्ला चौथो स्थानमा छ ।