काठमाडौं । पछिल्लो समय सिनेमाका कन्टेनमा युट्युब भ्युज कम हुने गरेको पाइएको छ । केही समयअगाडिको तुलनामा अहिले सिनेमाका कन्टेनमा कम भ्युज आउने गरेको हो । लाखौँ सब्सक्राइब भएका युट्युब च्यानलमा पनि निकै न्यून भिजिटर देखिन थालेको छ । 

यसको पछिल्लो उदाहरणका रूपमा चलचित्र ‘महाजात्रा’को कन्टेनलाई लिन सकिन्छ । यसको गीत, टिजर र ट्रेलरमा ठूलो संख्यामा भ्युज देखिएको छैन । सात दिन अगाडि सार्वजनिक यसको ट्रेलरमा साढे सात लाख भ्युज छ । दुई साता अगाडि रिलिज भएको टिजरमा चार लाख १२ हजार भ्युज छ । ४७ लाख लगानीमा बनेको यसको एक महिना अगाडि रिलिज गीतमा पनि १८ लाख मात्रै भ्युज छ । 

७.३६ मिलियन सब्सक्राइबर रहेको ओएसआर डिजिटलमा दुई दिन अगाडि रिलिज भएको चलचित्र ‘बोक्सीको घर’को टिजरमा ८० हजार पनि भ्युज पुगेको छैन । 

हिट सिनेमा मेकर रामबाबु गुरुङको चलचित्र ‘डिग्री माइला’को कन्टेनले पनि युट्युबमा उल्लेख्य भिजिटर पाउन सकेन । बासुरी फिल्मस युट्युब च्यनलबाट दुई हप्ता अगाडि सार्वजनिक टिजरमा १० लाख पनि भ्युज पाउन सकेको छैन । जब कि यसको क्ल्प्सि अर्बपति विनोद चौधरीले पनि आफ्नो सामाजिक सञ्जालमा सेयर गरेका थिए । तर पनि त्यति धेरै दर्शकको आकर्षण देखिएन । जबकी तीनवटै सिनेमामा अहिले बजारमा रुचाइएका कलाकार छन् । ‘महाजात्रा’ र ‘डिग्रीमाइला’ हिट सिनेमा निर्देशकका सिनेमा हुन् । ‘जात्रा’ सिरिज रुचाइएको सिनेमा हो । 

वाच टाइम जति कम भयो त्यति नै युट्युबले कम रिकमेन्ड गर्ने डिजिटल कन्टेन म्यानेजर राजेन्द्र आर्याल बताउँछन् । “भिडियोमा जति कम वाच टाइम हुन्छ, त्यति नै युट्युबले अरुलाई हेर्न कम डिकमेन्ड गर्छ,” राजेन्द्र भन्छन्, “भिजिटर किन कम भए त्यो त मैले पनि अध्ययन गरेको छैन । तर युट्युबले वाच टाइम जति कम भयो त्यति नै अरुलाई हेर्न कम सिफारिस गर्छ ।” 

भिडियो पूरै नहेर्नु अथवा थोरै मात्रै हेरिनुको कारण कन्टेन इङगेजिङ नहुनु हो । “सायद इंगेज हुने खालका कन्टेन भएनन् कि भन्ने हो । एकै खालका कन्टेन भएर दर्शकले हेरेनन् अथवा कम भए कि भन्ने हो,” राजेन्द्र भन्छन्, “फरक स्वादको कन्टेन भूपू पाण्डेको गीत पिरै पिर राम्रो गइरहेको छ । केही गीतको भ्युज करोडमा गएको छ ।”