काठमाडौं । पाकिस्तान स्टक एक्सचेन्ज (पीएसएक्स) इतिहासकै उच्चविन्दुमा पुगेको छ । बिहीबार पीएसएक्स ९०० अंकले बढेर पहिलोपटक एक लाख अंकमा पुगेको हो । बुधबार पीएसएक्स ९९ हजार २६९.२५ अंकमा बन्द भएको थियो । आज एक लाख २१६ अंकमा पुगेको छ ।

पाकिस्तानको सेयर बजार पछिल्लो दुई दिनदेखि उकालो लाग्ने क्रम जारी छ । नोभेम्बर २६ मा पीएसएक्स ९४,१८० अंकमा थियो । सेयर बजारमा बुधबार सबैभन्दा बढी वृद्धि देखिएको छ । पछिल्लो दुई दिनमा करिब ६ हजार विन्दुको उछाल आएको छ ।

सोह्र महिनाअघि पीएसएक्सको सेयर ४० हजार अंकको हाराहारीमा थियो । यो डेढ वर्ष भन्दा कम अवधिमा २५० प्रतिशतले बढेको छ।

टोपलाइन सेक्युरिटीजका प्रमुख कार्यकारी अधिकृत मोहम्मद सोहेलले पीएसएक्स ९० को दशकको अन्त्यतिर करिब १,००० विन्दु भएको बताए । पछिल्लो २५ वर्षमा सय गुणा बढेको छ । उनले आगामी १० वर्षमा पाकिस्तानको सेयर बजार करिब पाँच लाख अंकमा पुग्न सक्ने बताए ।

आईएमएफको सहयोगसँगै आर्थिक नीतिमा सुधार आएपछि लगानीकर्तामा उत्साह देखिएको उनको भनाइ छ । मुद्रास्फीति र ब्याजदरमा सोचेभन्दा बढी वृद्धि भएका कारण सेयर बजारमा सुधार आएको हो ।

टाइम्स अफ इन्डियाबाट ।