काठमाडौं । महिला राष्ट्रिय फुटबल टिमकी खेलाडी अञ्जिला तुम्बापो सुब्बाको जीवनबाट प्रभावित रहेको नेपाली चलचित्र ‘अञ्जिला’को फर्स्टलुक पोस्टर सार्वजनिक भएको छ ।
मिलन चाम्सको निर्देशन रहेको चलचित्रको पोस्टरमा अञ्जिला र अभिनेता दयाहाङ राई फिचर्ड छन् । पोस्टरबाट अञ्जिलाको ग्रामीण जीवनको संघर्षदेखि खेल जीवनसम्मको कथा चलचित्रमा रहेको संकेत गर्छ । ढाका टोपीमा देखिएका अभिनेता राईको भूमिकाबारे भने पोस्टरले स्पष्ट पारेको छैन ।
इलाम, झापा र काठमाडौंमा छायांकन गरिएको चलचित्रमा अञ्जिला स्वयं मुख्य भूमिकामा छिन् । उनीसँगै दयाहाङ राई, मिरुना मगर, सिर्जना सुब्बा, माओत्से गुरुङ, बुद्धि तामाङ, विजय बराल, प्रेम कुमार श्रेष्ठलगायतको अभिनय रहनेछ ।
अञ्जिलाको बालापनदेखि खेल जीवनसम्मको कथामा उनले फुटबलर बन्नका लागि गरेको संघर्ष र सफलताको कथामा चलचित्र बनेको निर्देशक चाम्सले बताएका छन् ।
