पोखरा । पोखरा महानगरपालिकाका मेयर धनराज आचार्यले 'बाह्रखरी गल्फ'ले पोखराको पर्यटन विकासमा सहयोग पुग्ने बताएका छन् ।
पोखरामा जारी नेपाल लिटरेचर फेस्टिबलको 'संस्कृति, भूगोल, भूगर्भ, पोखराका पर्यटकीय गन्तव्य' सेसनमा सहजकर्ता कनकमणि दिक्षितसँग कुराकानी गर्दै मेयर आचार्यले पर्यटनको क्षेत्रमा गल्फको विषय उठान गरेका हुन् ।
'पोखरामा कसरी पर्यटक भित्र्याउने र पर्यटनमार्फत आम्दानी कसरी बढाउन सकिन्छ ?' भन्ने प्रश्नमा मेयर आचार्यले बाह्रखरीले आयोजना गर्न लागेको गल्फजस्ता इभेन्ट पर्यटनको क्षेत्रमा महत्त्वपूर्ण हुने बताएका हुन् ।
पोखरामा छिट्टै बाह्रखरी गल्फ आयोजना हुँदै छ ।
“चैतको पहिलो हप्तामा एउटा विशेष कार्यक्रम हुँदै छ, पोखरामा । गल्फ टुर्नामेन्ट हुँदै छ । त्यसलाई हामीले हरेक वर्ष गर्ने गरी क्यालेन्डरमा राख्ने कुरा आयोजक साथीहरूसँग भएको छ । त्यो चाहिँ सायद खेलभित्रको सबैभन्दा महँगो, एउटा उदाहरण मात्र भनेको,” मेयर आचार्यले भने ।
बाह्रखरी गल्फजस्ता अरू इभेन्टहरू पोखरामा गर्न सकिने कुराहरूमा आफूहरूले योजनाभित्र राखेको उनले बताए ।
“त्यसका लागि आवश्यक पूर्वाधार बनाउने कुरामा, खासगरी अन्तर्राष्ट्रिय सम्मेलन केन्द्र बनाउने कुरा हामीले योजनामा राखेका छौँ,” उनले भने ।
