काठमाडौं । गण्डकी प्रदेशमाथि ६ विकेटको सहज जित निकाल्दै विभागीय टोली नेपाल पुलिस क्लबले प्रधानमन्त्री कप पुरुष राष्ट्रिय क्रिकेट प्रतियोगिताको फाइनलमा स्थान बनाएको छ । 

सोमबार मूलपानीस्थित माथिल्लो क्रिकेट मैदानमा सम्पन्न खेलमा गण्डकीले प्रस्तुत गरेको १७० रनको लक्ष्य पुलिसले २४.२ ओभरमा चार विकेट गुमाएर पूरा गर्‍यो ।

पुलिसको जितमा ओपनर दीलिप नाथले अर्धशतक बनाए । दिलीपले ३९ बलमा ६ चौका र चार छक्कासहित ५७ रन बनाए । अर्जुन साउदले ४४ रन थपे । कुशल भुर्तेलले आक्रमक ब्याटिङ गर्दै ६ बलमा चार चौका र एक छक्कासहित २२ रन थप्दा आरिफ सेखले २७ र शंकर रानाले १२ रन बनाए ।

गण्डकीका सन्दीप पराजुलीले दुई विकेट लिए । विपीन खत्री र कमल परियारले समान एक विकेट लिए ।

त्यसअघि टस हारेर ब्याटिङमा आएको गण्डकीले ३८.३ ओभरमा सबै विकेट गुमाएर १७० रनको योगफल खडा गरेको थियो । 

गण्डकीबाट नवौँ नम्बरमा ब्याटिङमा लागि आएका अमृत गुरुङले अर्धशतक बनाए पनि पुलिसको जितले त्यसलाई छायाँमा पार्‍यो । अमृतले ३९ बलमा आठ चौका र दुई छक्कासहित ५० रन बनाए । कमल परियार र करण पंगेनीले समान ३० रन थप्दा समिर कँडेलले २९ र कृष ऐयरले १० रन थपे ।

पुलिसका राशिद खानले पाँच विकेट लिए । ६ ओभर बलिङ गरेका राशिदले २५ रनमात्र खर्चिए । करण केसी र ललितनारायण राजवंशीले समान दुई विकेट लिँदा कप्तान दीपेन्द्रसिंह ऐरीले एक विकेट हात पारे ।

जितसँगै सात खेलबाट अंक जोडेको पुलिसले लिग चरणको अन्तिम दुई खेलअगावै फाइनलमा स्थान निश्चित गरेको छ । आठ खेलबाट चार अंक जोडेको गण्डकी भने तालिकाको आठौँ स्थानमा छ । 

सोमबारै भएको अर्को खेलमा त्रिभुवन आर्मी क्लबले सुदूरपश्चिम प्रदेशमाथि ९७ रनको सहज जित निकालेको छ । 

कीर्तिपुरस्थित त्रिवि क्रिकेट मैदानमा भएको खेलमा आर्मीले प्रस्तुत गरेको २६३ रनको लक्ष्य पछ्याउने क्रममा सुदूरपश्चिमले ४०.१ ओभरमा सबै विकेट गुमाएर १६५ रनमात्र जोड्न सक्यो । 

सुदूरपश्चिमलाई सस्तैमा समेट्न आर्मीबाट उत्कृष्ट बलिङ गरेका जितेन्द्र मुखियाले पाँच विकेट लिए । ६.१ ओभर बलिङ गरेका जितेन्द्रले दुई मेडन फ्याक्दै १० रनमात्र खर्चिए ।

जितसँगै आठ खेलबाट १२ अंक जोडेको आर्मी तालिकाको दोस्रो स्थानमा उक्लिएको छ । सात खेलबाट आठ अंक जोडेको सुदूरपश्चिम तालिकाको छैटौँ स्थानमा छ ।