काठमाडौं । प्रधानमन्त्री कप पुरुष राष्ट्रिय क्रिकेट प्रतियोगितामा गण्डकी प्रदेशविरुद्ध कोसी प्रदेश २५ रनमै अलआउट भएको छ । आइतबार मूलपानी क्रिकेट मैदानमा गण्डकीले प्रस्तुत गरेको १६८ रनको लक्ष्य पछ्याउने क्रममा कोसी १५.२ ओभरमा २५ रनमै अलआउट भएको हो ।

गण्डकीविरुद्ध १४२ रनको लज्जास्पद हार व्यहोर्दा कोसीका कुनै ब्याटरले दोहोरो अंकमा रन जोड्न सकेनन् । कोसीका कप्तान अंकित सुवेदीले आठ रन बनाउनु नै टिमको स्कोर बोर्डमा कुनै ब्याटरले थपेको सबैभन्दा धेरै रन बन्यो । कोसीका चार ब्याटर शून्यमा पभेलियन फर्किएका थिए ।

कोसीलाई सस्तैमा समेट्न गण्डकीका विपीन खत्रीले ६ विकेट लिए । सात ओभर बलिङ गरेका उनले तीन मेडन फ्याँक्दै चार रन मात्र खर्चिए । सन्दीप पराजुलीले तीन र अंकित न्यौपानेले एक विकेट लिए ।

त्यसअघि, टस हारेर ब्याटिङमा उत्रिएको गण्डकीले ४८.२ ओभरमा सबै विकेट गुमाएर १६७ रन बनाएको थियो । गण्डकीका मुस्कान थापाले ६७ रनको योगदान गरे । कप्तान विपीन खत्रीले ४३, कमल परियारले १३ रन जोडे ।

कोसीका अभ्यास तिम्सिनाले ६ विकेट लिए । फिर्दोस अन्सारी, सोनु मण्डल र कमल खत्रीले समान एक विकेट लिए ।

प्रतियोगितामा गण्डकीको यो पहिलो जित हो । जितसँगै चार खेलबाट दुई अंक जोडेको गण्डकी तालिकाको आठौँ स्थानमा छ । ६ खेल खेल्दा पनि अंकविहीन कोसी पुछारमा छ ।