काठमाडौं । प्रधानमन्त्री कप पुरुष राष्ट्रिय क्रिकेट प्रतियोगितामा मधेस प्रदेशले कर्णाली प्रदेशलाई पराजित गरेको छ । शनिबार कीर्तिपुरस्थित त्रिवि क्रिकेट मैदानमा मधेसले कर्णालीलाई ६१ रनले हराएको हो ।

जितका निम्ति २३२ रनको लक्ष्य पछ्याएको कर्णाली ४१.१ ओभरमा १७० रनमा समेटियो । कर्णालीका अर्जुन घर्तीले ५८ रन बनाए । मधेसका राजेश यादवले तीन विकेट लिए ।

त्यसअघि, टस जितेर ब्याटिङ रोजेको मधेसले ५० ओभरमा ९ विकेट गुमाउँदै २३१ रन बनाएको थियो । मधेसका कप्तान हरिशंकर साह र मयन यादवले समान ५०–५० रन बनाए । कर्णालीका दीपेन्द्र रावतले चार विकेट लिए ।

पाँच खेलमा तीन जितसहित मधेस तालिकाको तेस्रो स्थानमा उक्लिएको छ । पराजित कर्णाली ४ अंकका साथ सातौँ स्थानमा छ ।हिमालयन टेली भ्वाइस