काठमाडौं । ब्याटिङमा आशुतोस घिरैया र बलिङमा इशान पाण्डे चम्किएपछि प्रधानमन्त्री कप पुरुष राष्ट्रिय क्रिकेट प्रतियोगितामा वाग्मती प्रदेशले कोसी प्रदेशविरुद्ध ६४ रनको सहज जित निकालेको छ ।

शुक्रबार कीर्तिपुरस्थित त्रिवि क्रिकेट मैदानमा सम्पन्न खेलम वाग्मतीले प्रस्तुत गरेको २७४ रनको लक्ष्य पछ्याउने क्रममा कोसीले ४७.१ ओभरमा सबै विकेट गुमाएर २०९ रनमात्र बनाउन सक्यो ।

कोसीका दुई ब्याटरले अर्धशतक बनाए पनि टिमको हार टार्न सकेनन् । कोसीका सुजन थपलियाले ५९ रन बनाए । कप्तान अंकित सुवेदीले ५३ रन थपे । आइस भट्टराईले ३२, सोनु अन्सारीले २१ र हेमन्त राईले १० रन जोडे ।

कोसीविरुद्ध कसिलो बलिङ गरेका वाग्मतीका इशान पाण्डेले पाँच विकेट लिए । आठ ओभर बलिङमा इशानले ३९ रनमात्र खर्चिए । सूर्य तामाङले दुई विकेट लिँदा रिजन ढकाल र प्रतीक श्रेष्ठले समान एक विकेट लिए ।

त्यसअघि आशुतोस घिरैयाले शतक बनाएपछि टस हारेर ब्याटिङमा आएको वाग्मतीले ४८.३ ओभरमा सबै विकेट गुमाएर २७३ रनको योगफल खडा गरेको थियो । 

वाग्मतीका ओपनर आशुतोसले १११ बलमा १६ चौका र दुई छक्कासहित ११८ रन बनाए । कप्तान रित गौतमले ४९ रन थपे । रविन जोशीले ४३ र प्रतिक श्रेष्ठले १९ रन जोडे । 

कोसीका अभ्यास तिम्सिनाले तीन विकेट लिए । कमल खत्री र हेमन्त राईले समान दुई विकेट लिँदा फिर्दोस अन्सारीले एक विकेट हात पारे ।

जितसँगै पाँच खेलबाट ६ अंक जोडेको वाग्मती तालिकाको दोस्रो स्थानमा उक्लिएको छ । पाँच खेल खेल्दा पनि जितविहीन कोसी तालिकाको पुछारमा छ ।