काठमाडौं । आर्सनलले जर्मनीका फरवार्ड काई हाभर्टलाई चेल्सीबाट ६५ मिलियन पाउन्डमा अनुबन्ध गरेको छ । 

आर्सनलले हाभर्टसँग सन् २०२८ सम्मको सम्झौता गरेको छ । यसअघि, २४ वर्षीय हाभर्ट तीन वर्षको सम्झौतासहित ७१ मिलियन पाउन्डमा बायर्न लेभरकुजेनबाट चेल्सी आएका थिए ।

हाभर्टले चेल्सीका लागि ९१ खेलमा १९ गोल गरेका छन् । चेल्सीले सन् २०२१ को च्याम्पियन्स लिगको फाइनलमा म्यानचेस्टर सिटीलाई १–० ले हराउँदा हाभर्टले नै निर्णायक गोल गरेका थिए ।

“तपाईंहरूको समर्थनका लागि ठूलो धन्यवाद । हामीले च्याम्पियन्स लिग जित्ने सपना एकसाथ साकार पार्‍यौँ,” चेल्सी छोडेपछि हाभर्टले भने ।

आसर्नलमा अनुबन्धपछि हाभर्टले नयाँ क्लबबाट उपाधि जित्ने लक्ष्य रहेको बताए । “यो उत्कृष्ट क्लबमा जोडिन पाउनु मेरो लागि निकै उत्साहित कुरा हो । यो क्लबसँग निकै लामो इतिहास छ । र, मलाई आशा छ, यहाँ मैले धेरै कुरा प्राप्त गर्नेछु,” हाभर्टले भने ।