काठमाडौं । राष्ट्रिय स्वतन्त्र पार्टीका सांसद मनिष झाले राष्ट्रपति रामचन्द्र पौडेलले प्रमाणीकरण गरेको नागरिकता विधेयक प्रकृयासंगत नआएको बताएका छन् । उनले विधेयक आवश्यक भए पनि संसद् चलिरहेको बेला संसद्लाई छलेर विधेयक ल्याउनु उचित नभएको बताए ।

बाह्रखरीसँग कुराकानी गर्दै उनले देशमा नागरिकता पाएकाहरू बेचेर शरणार्थी बन्न जाने र नागरिकताको अभावमा आफ्नै देशमा अनागरिक भएर पीडामा बस्नुपर्ने विडम्वना व्याप्त रहेको बताए ।

“जुन देशमा उच्च पदस्थ व्यक्ति मिलेर आफ्नै देशका नागरिकलाई शरणार्थी बनाएर बेच्न खोज्छन्, त्यही देशमा अर्कोपट्टि चाहिँ आफ्नै देशको नागरिक नागरिकता नपाएर पीडित छन् । यो मिल्दो भएन,” उनले भने, “नागरिक हुनैपर्ने नागरिकले नागरिकता नपाउनु पीडादायी कुरा हो । म मधेसको मान्छे भएकाले पनि मैले प्रत्यक्ष पीडा देखेको छु । तर, सुटुक्क नेपाली नागरिक भएकाहरू पनि मैले देखेको छु । तर, जे जस्तो भए पनि संविधानले दिएको अधिकार हो । कानुन, संविधान कार्यान्वयन गर्नु अपरिहार्य हो ।”

उनले थपे, “तर, संसद् चलिरहेको अवस्थामा संसदीय प्रकृयाबाट आउनुपर्थ्यो । सांसदहरूले यसलाई अघि बढाउनुपर्थ्यो । अहिले अपनाइएको प्रकृया गलत भयो ।”

सांसद झाले संविधानले दिएको अधिकारबाट कोही पनि वञ्चित हुन नहुने जानकारी दिए ।

“अनागरिक हुनु सबैभन्दा ठूलो पीडा हो । नागरिकता नपाएकाहरूले नागरिकता पाउनुपर्छ नै । जो नेपाली नागरिक हुन्, उनीहरूले नागरिकता पाउनुपर्‍यो नि,” झाले बाह्रखरीसँग भने ।

सांसद झाले प्रधानमन्त्रीको भारत भ्रमण र समकक्षीहरूसँगको भेटको सम्मुखमा किन गरियो भन्ने प्रश्न भने उब्जाएको उनले प्रतिकृया दिए ।