काठमाडौं । पहिलो दिन ६ अन्डर ६६ स्कोर गरेका सुवास तामाङले सोमबार नेपाल एमेच्योर ओपनमा अग्रता लिएका छन् । काठमाडौंको गोकर्ण गल्फ क्लबमा आजबाट सुरु भएको प्रतियोगितामा सुवासले आफ्नै देशका सद्भाव आचार्य र भारतका सुमित कोटवाललाई दुई स्ट्रोकले पछि पारेका हुन् ।

सुवासका टिम सहयात्री सद्भाव र भारतका कोटवालले चार अन्डर ६८ स्कोर गरेका थिए । सुवास र सद्भावको जोडीले टिम इभेन्टमा पनि अग्रता बनाउन सफल भएका छन् । टिम नेपालले १०–अन्डर १३४ स्कोर गरेका छन् ।

टिम इभेन्टमा भुटान दोस्रो स्थानमा छ । भुटानले २–अन्डर १४४ स्कोर गरेको छ । बंगलादेश तेस्रो र भारत चौथो स्थानमा छ । बंगलादेशले एक ओभर १४५ र भारतले तीन ओभर १४७ स्कोर गरेको छ । पाँचौँ स्थानमा रहको पाकिस्तानले १३ ओभर १५७ स्कोर गरेको छ ।

व्यक्तिगत स्पर्धामा सुवास शीर्ष स्थानमा रहँदा सद्भाव र कोटवाल संयुक्त रूपमा दोस्रो स्थानमा छन् । व्यक्तिगत स्पर्धाको चौथो स्थानमा रहन सफल भुटानका युगेन दोर्जीले ३–अन्डर ६९ स्कोर गरे । बंगलादेशका मोहम्मद सुमोन २–अन्डर ७० को स्कोर गर्दै पाँचौँ स्थानमा छन् । 

भुटानका टासी छिरिङ १–अन्डर ७१ स्कोरका साथ छैटौँ स्थानमा छन् । भुटानकै कर्मा दोर्जी खार्को र भारतका बरुण मुथप्पा १–ओभर ७३ स्कोरका साथ संयुक्त रुपमा सातौँ स्थानमा छन् । 

वाङ्चेन धोन्डुप, टासी दोङ, रेओन करिप्पा र प्रदीप केसी संयुक्त रुपमा नवौँ स्थानमा छन् । चारै जनाले समान २–ओभर ७४ स्कोर गरेका थिए । गर्ब लखमणी, शोफिक इस्लाम र हृदेशकुमार सिंह संयुक्त रुपमा १३औँ स्थानमा छन् । उनीहरू समान ३–ओभर ७५ स्कोर गरेका थिए । 

नेपाल पर्यटन बोर्डसँगको सहकार्यमा भइरहेको यस प्रतियोगिता ७२ पारमा खेलाइएको छ । बुधबार सम्पन्न हुने प्रतियोगिता खेलाडीले तीन दिनसम्म ५४ होलमा प्रतिस्पर्धा गर्नेछन् । 

प्रतियोगितामा बंगलादेश, भुटान, भारत, पाकिस्तान र नेपालका गल्फरले प्रतिस्पर्धा गरिरहेका छन् । गर्ने छन् । पुरुषतर्फ ३६ होलको खेलपछि कट हुनेछ । कटपछि शीर्ष ३० खेलाडीले अर्को चरणमा प्रतिस्पर्धा गर्नेछन् । महिलाको छुट्टै प्रतिस्पर्धा हुनेछ । महिलामा सात खेलाडीले प्रतिस्पर्धा गरिरहेका छन् ।

प्रतियोगितामा पाकिस्तानका तीन, बंगलादेशका दुई, भुटानका चार, भारतका सात, नेपालबाट २९ खेलाडीले प्रतिस्पर्धा गरेका छन् । 

प्रतियोगिताको टिम इभेन्टका लागि प्रत्येक देशले दुई खेलाडीलाई मनोनीत गरेका छन् । सोमबार र मंगलबार ३६ होलमा बटुलेको अंक नै टिम इभेन्टमा निर्णायक बन्नेछ । टिम इभेन्टका लागि नेपालबाट सुवास तामाङ र सद्भाव आचार्य, भारतबाट सुरज जोशी र सुमित कोटवाल, पाकिस्तानबाट ओमार इजाज र उमैर सलीम, बंगलादेशबाट शोफिकल स्लाम र मोहम्मद सुमोन र भुटानबाट उगेन दोर्जी र कर्मा दोर्जी खोर्कोले प्रतिस्पर्धा गरिरहेका छन् ।