कास्की । सशस्त्र प्रहरी बलको एपीएफ क्लबले कास्कीको पोखरामा भएको ‘तेस्रो टाइगर कप राष्ट्रिय तथा अन्तर्राष्ट्रिय आमन्त्रित खुला क्लब च्याम्पियनसिप महिला तथा पुरुष भलिबल प्रतियोगिता’को महिलातर्फको उपाधि जितेको छ ।
शनिबार पोखरा रंगशालामा भएको खेलमा अर्को विभागीय त्रिभुवन आर्मी क्लबलाई ३–१ को सेटमा पन्छाउँदै एपीएफले उपाधि जितेको हो । एपीएफले पहिलो सेट २५–२० ले जितेको थियो । दोस्रो सेट आर्मीले २५–२२ ले जित्यो । तेस्रो सेट २५–८ ले आफ्नो पक्षमा पारेको एपीएफले चौथो सेट २५–२२ अंकले जित्दै विजेता बनेको हो ।
एपीएफले पाँच लाख रुपैयाँसहित ट्रफी पुरस्कार प्राप्त गर्दा उपविजेता आर्मीले दुई लाख ५० हजार प्राप्त गरेको छ ।
प्रतियोगिताको पुरुषतर्फ उपाधिका लागि घरेलु टोली गण्डकी प्रदेश र एपीएफ भिड्दै छन् ।
भलिबल खेलको विकास गरी देशका लागि आवश्यक राष्ट्रिय र अन्तर्राष्ट्रियस्तरका खेलाडी उत्पादनको लक्ष्यसहित टाइगर ग्रुप अफ पोखरा नेपालले यही माघ ८ गतेदेखि प्रतियोगिता आयोजना गरेको हो । रासस
