काठमाडौं । धितोपत्र दोस्रो बजार मापक नेप्से परिसूचक साताको अन्तिम कारोबार दिन बिहीबार स्थिर रहेको छ । बुधबारको तुलनामा नेप्से १.३८ अंकले घटेर १८४४.१४ विन्दु कायम भएको हो ।

बिहीबार नेप्से परिसूचक स्थिर रहँदा कारोबार रकम भने घटेको छ । बुधबार ६४ करोड रुपैयाँभन्दा बढीको सेयर करोबार भएकोमा यस दिन घटेर ५० करोड ७६ लाख रुपैयाँको करोबार भएको छ । बिहीबार २२१ धितोपत्रका १५ लाख ४६ हजार ८५७ कित्ता सेयर खरिद–बिक्री भयो ।

यस दिन सेन्सेटिभ इन्डेक्स भने ०.०२ प्रतिशतले वृद्धि भएको छ । सेन्सेटिभ इन्डेक्स ३६३.०५ विन्दु कायम भएको छ ।

नेप्सेमा सूचीकृत भएदेखि नै लगातार सकारात्मक सर्किट लाग्दै आएको अभियान लघुवित्त वित्तीय संस्थाको सेयर मूल्य बिहीबार ६.५९ प्रतिशतले घटेको छ । यो कम्पनीको सेयर मूल्य एकै दिन ५८ रुपैयाँ ६० पैसा घटेको हो ।

यस दिन सर्वाधिक गुमाउनेमा सामुदायिक लघुवित्त वित्तीय संस्था लिमिटेडका सेयरधनी रहेका छन् । प्रतिशतको हिसाबले सबैभन्दा बढी सेन्चुरी डिबेन्चर २०८८ का ऋणपत्रधनीले ७.७३ प्रतिशत गुमाएका छन् । सामुदायिक लघुवित्तका लगानीकर्ताले प्रतिकित्ता ९९ रुपैयाँ गुमाएका छन् ।

बिहीबार सर्वाधिक मूल्यको सेयर कारोबार अभियान लघुवित्त वित्तीय संस्थाको भएको छ । यो कम्पनीको तीन करोड ६९ लाख रुपैयाँको सेयर खरिद–बिक्री भयो ।

यस्तै, गरिमा विकास बैंक, एभरेस्ट बैंक र नबिल बैंकको दुई करोडभन्दा बढीको सेयर खरिद–बिक्री भएको छ ।

कारोबारमा आएका १३ समूहमध्ये तीन समूहको परिसूचक बढेको छ । बाँकी समूहको परिसूचक घटेको छ । सर्वाधिक परिसूचक वृद्धि हुनेमा उत्पादन तथा प्रशोधन समूह छ । यो समूहको परिसूचक ०.६९ प्रतिशत वृद्धि भएको छ ।

सर्वाधिक परिसूचक घट्नेमा हाइड्रोपावर समूह छ । यो समूहको परिसूचक ०.५३ प्रतिशत घटेको छ ।