काठमाडौं । नेपाल क्रिकेट संघ (क्यान)को केन्द्रीय कार्यसमिति बैठकप्रति पदाधिकारीहरू असन्तुष्ट बनेका छन् ।

क्यानको बिहीबार बसेको बैठकले कुल १३ निर्णय गरेको थियो । सोही बैठकले क्यानका उपाध्यक्ष रोशनकुमार सिंहसहित दुई कार्यसमिति सदस्य र एक जिल्ला क्रिकेट संघका अध्यक्षलाई स्पष्टीकरण सोध्ने निर्णयसमेत गरेको छ । जसमा कार्यसमिति सदस्यद्वय दुर्गाराज पाठक र माधवकुमार कर्माचार्यसँगै सुनसरी जिल्ला क्रिकेट संघका अध्यक्ष चेतनाथ पौडेल छन् ।

क्यानले ट्वान्टी–२० विश्वकपमा दौरान संघ र पदाधिकारीहरूलाई लक्षित गरी आधारहिन कुराहरू र विवादास्पद अभिव्यक्ति दिएर नकारात्मक सन्देश प्रवाह गरेको भन्दै पदाधिकारीहरूलाई स्पष्टीकरण सोध्ने निर्णय गरिएको जनाएको छ । तर, केन्द्रीय सदस्य पाठकले भने क्यानमा व्यक्तिवाद हावी बनेको बताए ।

“विश्वकपका लागि गएको नेपाली टिमको खर्चमा हाम्रो असहमति छ । खर्चको विवरण नल्याइ आफ्नो तरिकाले गर्न खोजिरहेका छन् । यसमा हाम्रो आपत्ति हो । हामीले यसमा कुरा राख्दा उहाँहरू अलि आक्रोशित बन्नु भयो,” पाठकले बाह्रखरीसँग भने, “अलि व्यक्तिवाद हावी भएजस्तो भयो । यो लोकतान्त्रिक संस्था हो । यहाँ आफ्नो विचार राख्न पाउने अधिकार छ । संस्थागत विषयमा धारणा राख्ने हो । मैले अहिलेसम्म संस्थाको अहितमा कुनै पनि धारणा राखेको छैन ।”

यस्तै, उपाध्यक्ष सिंहले सत्य नलुक्ने जनाउँदै आउँदो आइतबार क्यानबाट भएको निर्णयप्रति आफूहरूले धारणा सार्वजनिक गर्ने बताए ।

“उहाँहरूले के गर्नुभयो– के आधारमा गर्नुभयो भन्ने विषयमा जान चाहँदैनौँ । आइतबारपछि यसबारे केही कुरा आउँछ होला,” सिंहले बाह्रखरीसँग भने, “सत्य लुक्दैन । सत्यको लडाइँमा लड्दा भएका कुराहरू प्रमाणित नै छन् । हामीले पनि यसबारे आफ्नो कुराहरू बाहिर ल्याउने छौँ ।”