काठमाडौं । धितोपत्र दोस्रो बजारमा कारोबार गर्नेहरूका लागि यो साता उत्साहमय रह्यो । यो साता बजारमा एकैदिन दुईवटा सकारात्मक सर्किट लाग्यो, बजार एक घण्टा बन्द पनि भयो ।

यो गत मंगलबारको कुरा हो । उक्त दिन बजार खुलेको एक मिनेटमा ११ बजेर एक मिनेट जाँदा नै नेप्से ४ प्रतिशतले बढेर सकारात्मक सर्किट लागेको थियो ।

धितोपत्र कारोबार नियमावलीअनुसार बजार खुलेको पहिलो एक घण्टामा नेप्से परिसूचक ४ प्रतिशत घटे वा बढे २० मिनेट बन्द हुन्छ । त्यसपछि पुनः बजार खुलेको एक घण्टामा ५ प्रतिशत बढेर वा घटेर सर्किट लागे पुनः ४० मिनेट बजार बन्द हुने व्यवस्था छ । यसका साथै त्यसपछि ६ प्रतिशत बढेर वा घटेर बजारमा सर्किट लागेमा त्यो दिनको सेयर कारोबार बन्द हुन्छ ।

मंगलबार बजार खुलेको पहिलो एक घण्टामा नै दुई सर्किट लागेर नेप्से १०२.६८ अंकले बढेको थियो । मंगलबार दुईपटक सर्किट लाग्दा बजार २१६२.४९ विन्दुसम्म पुगेको थियो । यो हप्ताको सबैभन्दा उच्च विन्दु पनि यही बन्यो ।

यो साता समग्रमा नेप्से परिसूचकसँगै कारोबार रकम पनि बढ्यो । सातामा नेप्से परिसूचक ६७.७६ अंकले बढ्यो भने कारोबार रकम एक अर्ब ३३ करोड ६४ लाख रुपैयाँले बढ्न पुग्यो । आइतबारदेखि बिहीबारसम्मको एक सातामा २२ अर्ब ७५ करोड रुपैयाँको सेयर कारोबार भएको नेपाल स्टक एक्सचेन्जले जनाएको छ । गत साता २१ अर्ब ४१ करोड ३६ लाख रुपैयाँको सेयर कारोबार भएको थियो ।

यो साताको आइतबारबाहेक बाँकी चार कारोबार दिनमा बजार बढेको थियो । आइतबार बजार १४.८३ अंकले घट्यो भने सोमबार, मंगलबार, बुधबार र बिहीबार बजार लगातार बढेको थियो ।

सोमबार १६.२९ अंक, मंगलबार ४७.०४ अंक, बुधबार ३.७९ अंक र साताको अन्तिम कारोबार दिन बिहीबार १५.४७ अंकले नेप्से बढ्यो ।

गत साता तीन कारोबार दिन बजार घटेको थियो भने बाँकी दुई कारोबार दिन मात्र बजार बढेको थियो । गत साता समग्रमा बजार १६.४ अंकले बजार घटेको थियो ।

सेयर कारोबार बढ्दा लगानीकर्ताको सम्पत्ति (कुल बजार पुँजीकरण) एक खर्ब आठ अर्ब रुपैयाँले बढेको छ ।

यो साताको अन्तिम करोबार दिन कुल बजार पुँजीकरण ३३ खर्ब ६२ अर्ब २१ करोड रुपैयाँ छ । गत साताको अन्तिम कारोबार दिन कुल बजारपुँजीकरण ३२ खर्ब ५३ अर्ब ७४ करोड रुपैयाँ कायम थियो ।