काठमाडौ । काठमाडौंको गोठाटारमा लाल मोहम्मदको गोली हानी हत्या गरेको आरोपमा पक्राउ परेका तीनजनालाई प्रहरीले सार्वजनिक गरेको छ ।

काठमाडौं प्रहरी परिसरले उनीहरूलाई आज सार्वजनिक गरेको हो । पक्राउ पर्नेहरूमा वीरगञ्ज महानगरपालिका–१६ का २१ वर्षीय महोरम मियाँ, रेहान मियाँ र मकवानपुरको बकैया गाउँपालिका घर भई काठमाडौंको कपन बस्ने २१ वर्षीया सुस्मिता स्याङताङ छन् ।  

प्रहरीका अनुसार महोरम र रेहान मियाँले हतियार व्यवस्थापनको काम गरेका थिए । उनीहरूले घटनामा प्रयोग भएको हतियार वीरगञ्जबाट काठमाडौं पठाएको पाइएको छ ।

सुस्मिताले लाल मोहम्मदका गतिविधि निगरानी गर्ने गरेको खुलेको छ । मोहम्मदमाथि असोज ३ गते साँझ गोली प्रहार भएको थियो ।

मोहम्मदलाई बा.६ च ५१५२ नम्बरको गाडीबाट ओर्लनासाथ दुई जनाले गोली हानेर भागेका थिए । उनी आफ्नो गाडीबाट ओर्लिएपछि हतियारधारीले लखेटेर गोली प्रहार गरेका थिए । उनको हत्यामा भारतीय अपराधिक समूहको संलग्नता हुन सक्ने आशंका गरिँदै आएको छ ।

घटनाको अनुसन्धानका लागि एसएसपी जनकराज भट्टराईको नेतृत्वमा एक समिति गठन गरिएको थियो ।