विराटनगर । प्रदेश नम्बर–१ सरकारले सञ्चालन गर्दै आएको मोरङको बूढीगंगा गाउँपालिकास्थित मनमोहन प्राविधिक विश्वविद्यालयमा कर्मचारीले तालाबन्दी गरेका छन् ।

विश्वविद्यालयमा कार्यरत कर्मचारी तथा शिक्षकहरूका माग सम्बोधन नगरिएको भन्दै उनीहरूले तालाबन्दी गरेका हुन् । शिक्षक तथा कर्मचारीले उपकुलपति, सेवा आयोगका अध्यक्ष, रजिष्ट्रार र प्राचार्यको कार्यकक्षमा तालाबन्दी गरेका छन् ।

मनमोहन प्राविधिक विश्वविद्यालय प्राध्यापक संघ र कर्मचारी संघले यसअघि नै उपकुलपतिसमक्ष १८ बुँदे माग पेस गरेका थिए । माग पूरा नहुन्जेलसम्म तालाबन्दी जारी रहने उनीहरूले जनाएका छन् । छलफलबिनै नियुक्ति तथा बढुवासम्बन्धी कार्यविधि पारित गरिएको ती दुई संघले जनाएका छन् ।

स्थायी शिक्षक तथा कर्मचारीको बढुवा र करार कर्मचारीलाई स्थायी गरी सूचना प्रकाशित गर्ने सर्त कार्यान्वयन नभएको कर्मचारीको भनाइ छ ।

विश्वविद्यालयमा विभिन्न प्राविधिक विषय पठनपाठन हुँदै आएको छ ।