काठमाडौं । पटक–पटक स्थगित अखिल नेपाल फुटबल संघ (एन्फा)का कार्यसमितिको दोस्रो बैठक आज बस्दै छ । पदीय भागबन्डा पेचिलो बन्दा फुटबल विकासका एजेन्डा भने छायामा परेका छन् ।

यसअघि, यही साउन २ गतेका लागि एन्फा बैठक बेलाइएको थियो । तर, सोही दिन अचानक अध्यक्ष पंकजविक्रम नेम्वाङको मुटुमा समस्या देखिएपछि बैठक स्थगित गरिएको थियो । त्यसको दुई दिनपछि साउन ५ गते पुनः बैठक बोलाइएको थियो । तर, एजेन्डामा प्रवेश नै नगरी अध्यक्ष नेम्वाङले बैठक स्थगित गरेका थिए । त्यसको २० दिनपछि आज सातदोबाटोस्थित एन्फा मुख्यालयमा पुनः बैठक बस्दै छ ।

निर्वाचनमा एउटै प्यानलबाट प्रतिस्पर्धा गरे पनि नेतृत्वमा पुगेपछि पदीय भागबन्डामा कुरा नमिल्दा नेम्वाङ समूह चर्को आन्तरिक विवादमा फसेको छ । पूर्वसहमतिअनुसार महासचिवमा किरण राई, कोषाध्यक्षमा रवीन्द्र जोशी र अन्तर्राष्ट्रिय सम्बन्ध प्रमुखमा नवीन पाँडेलाई नियुक्त गरिसकेपछि नेम्वाङले धोका दिएको भन्दै वरिष्ठ उपाध्यक्ष वीरबहादुर खड्का, उपाध्यक्ष विराटजंग शाही र दीपक खतिवडालगायत १० जना विरोधमा उत्रिएका छन् ।

गणेश थापा पक्ष भनिएका वरिष्ठ उपाध्यक्ष खड्कालगायत पदाधिकारीले प्रमुख कार्यकारी अधिकृतमा गौरव थापा, प्रवक्तामा सुरेश शाह र सहमहासचिवलगायत पदमा पनि सोहीअनुसार नियुक्त गर्नुपर्ने माग राखेका थिए । त्यसमा पाँडेको चर्को असन्तुष्टि छ । पाँडे नेम्वाङका खास मान्छे हुन् ।

नेम्वाङले पाँडेको दबाबमा कुनै पनि हालतमा गौरवलाई नियुक्त नगर्ने रणनीति अपनाएपछि वरिष्ठ उपाध्यक्ष खड्का, उपाध्यक्ष शाही र खतिवडालगायत १२ जनाले पाँडेको नियुक्ति नै बदर गर्न हस्ताक्षर गरेर महासचिव राईलाई बुझाएका छन् । र, पाँडेको बर्खास्ती बैठकको एजेन्डा बनाउन माग गरेका थिए । त्यसपछि नेम्वाङले बैठक नै स्थगित गरिदिएका थिए ।

साउन २ गतेको बैठकका लागि एन्फा सचिवालयले १२ एजेन्डा पठाएको थियो । त्यसमा शेर्पा प्यानलबाट विजयी भएका उपाध्यक्ष दीर्घबहादुर (कुमार) केसीले पेस गरेका पाँच एजेन्डा पनि थपिएको छ । साउन ५ गतेको बैठकका लागि १७ एजेन्डा थिए । यसबाहेक पनि महिला सदस्य पेमा लामाले उठाएका चार एजेन्डा पनि आजको बैठकका लागि एजेन्डामा समावेश गरिएको बताएको छ । साथै, पाँडे बर्खास्तीको माग पनि एजेन्डका रूपमा छलफल हुने महासचिव राईले बताएका छन् ।