सोलुखुम्बु । सोलुखुम्बुको सोलुदूधकुण्ड नगरपालिका–२, थुम्लिङमा गए राति भएको आगलागीमा परी एकजनाको मृत्यु भएको छ । अन्दाजी ४० वर्षीय नवराज खालिङ राईको मृत्यु भएको वडा सदस्य हरिाकाजी श्रेष्ठले जानकारी दिए ।

उनका अनुसार, बलबहादुर नेवारको घाँस राख्ने गोठमा आगलागी हुँदा खालिङको ज्यान गएको हो । खालिङ विगत १५ वर्षदेखि बेवारिसे अवस्थामा बस्दै आएका थिए ।

बिहीबार राति सोही गोठमा बसेका खालिङले चुरोट खाने क्रममा आगलागी भएको अनुमान गरिएको सोलुखुम्बुका प्रमुख जिल्ला अधिकारी अनोजकुमार घिमिरेले बताए ।

थप अनुसन्धानका निम्ति प्रमुख जिल्ला अधिकारी घिमिरे, प्रहरी नायब उपरीक्षक द्वारिकाप्रसाद घिमिरे र चिकित्सकसहितको टोली घटनास्थलमा पुगेको छ ।

आगलागीबाट जलेर चिन्न नसक्ने अवस्थामा रहेका खालिङको शव परीक्षणका निम्ति जिल्ला अस्पताल फाप्लुमा ल्याइएको प्रजिअ घिमिरेले बताए । रासस