काठमाडौं । ओपनर कुशल भुर्तेलको अर्धशतकप्रेरित नेपाल पुलिस क्लबले जय ट्रफी पुरुष इलाइट कपमा मधेस प्रदेशविरुद्ध पहिलो दिन ४५ रनको अग्रता बनाएको छ ।

बुधबार पर्साको वीरगन्जस्थित नारायणी क्रिकेट मैदानमा सम्पन्न पहिलो दिनको खेलमा टस हारेर पहिले ब्याटिङमा आएको मधेसले १२९ रन बनाएको थियो । पहिलो इनिङमा जवाफी ब्याटिङमा उत्रिएको पुलिसले ४० ओभरमा स्टम्प हुँदासम्म तीन विकेट गुमाएर १७४ रन बनाएको छ ।

पुलिसका ओपनर कुशलले ६३ रनको अर्धशतकीय इनिङ खेले । उनले ६८ बलमा १० चौका प्रहार गरे । यसअघि कुशल पहिलो खेलमा त्रिभुवन आर्मीविरुद्ध पहिलो इनिङमा डक हुँदा दोस्रो इनिङमा पनि पाँच रनमै पभेलियन फर्किएका थिए । पुलिसका अर्का ओपनर दीलिप नाथले ४० रन बनाए । अर्धशतकबाट १० रनले चुकेका नाथले ७९ बलमा चार चौका प्रहार गरे ।

हाल अविजित रहेको अमित श्रेष्ठ ३४ र कप्तान आरिफ सेख १३ रनमा खेलिरहेका छन् । यसबाहेक, गुल्सन झाले १४ बलमा तीन छक्कासहित २० रन जोडे ।

मधेसका कप्तान हरिशंकर साहले दुई विकेट लिएका छन् । नौ ओभर बलिङ गरेका हरिशंकरले एक मेडन फ्याक्दै २५ रन खर्चिएका छन् । अभिषेक तिवारीले एक विकेट लिएका छन् ।

त्यसअघि मयन यादवको अर्धशतकका बाबजुद मधेसले ४२.२ ओभरमा १२९ रनमा समेटिएको थियो ।

मधेसका ओपनर मयनले ५९ रन बनाए । यसअघि, पहिलो खेलमा वाग्मती प्रदेशविरुद्ध शतकीय इनिङ खेलेका मयनले १०२ बलमा पाँच चौका र दुई छक्का प्रहार गरेका थिए ।

यस्तै, अविजित रहेका अभिषेक तिवारीले २९ बलमा चार चौकासहित १७ रन थपे । यसबाहेक, मधेसका अन्य ब्याटर दोहोरो अंकसम्म पुग्न सकेनन् ।

मधेसलाई पहिलो इनिङमा सस्तैमा रोक्न पुलिसका गुल्सन झाले सर्वाधिक पाँच विकेट लिए । १३ ओभर बलिङ गरेका गुल्सनले चार मेडन फ्याँक्दै ४० रन खर्चिए ।

कुशल भुर्तेलले दुई विकेट लिए । श्रवण यादव र ललित राजवंशीको नाममा समान एक विकेट रह्यो ।

यसअघि, मधेसले पहिलो खेलमा वाग्मती प्रदेशसँग बराबरी खेलेको थियो । यस्तै, पुलिसले पनि पहिलो खेलमा अर्को विभागीय टोली त्रिभुवन आर्मी क्लबसँग बराबरी खेलेको थियो ।