वासिङटन डीसी । अमेरिकाले अफगानिस्तानमा गरेको ड्रोन हमलामा परी अल–कायदाका नेता अयमान अल जवाहिरी मारिएको राष्ट्रपति जो बाइडेनले पुष्टि गरेका छन् ।

अफगानिस्तानको राजधानी काबुलमा अमेरिकाको गुप्तचर संस्था सीआईएले गरेको प्रतिआतंकवाद कारबाहीमा आइतबार जवाहिरीको मृत्यु भएको हो । तत्कालीन समयमा जवाहिरी र ओसामा बिन लादेनले मिलेर ‘९÷११’ आक्रमणको योजना बनाएको बेलायती समाचार संस्था बीबीसीले जनाएको छ ।

जवाहिरी अमेरिकाको ‘मोस्ट वान्टेड’ आतंकवादीमध्ये एक थिए । राष्ट्रपति बाइडेनले भने, “जवाहिरीले अमेरिकी नागरिकविरुद्ध हत्या र हिंसाको बाटो कोरेका थिए ।”

उनले थपे, “अमेरिकाले ११ वर्ष पहिले बिन लादेनलाई मारेर न्याय गरेदेखि जवाहिरी अल कायदाका नेता भएका थिए । लुकेर उनले अल कायदाका शाखाहरू र संसारभरि समन्वय गरिराखेका थिए । जसमा अप्रेसन परिचालन गर्न मार्गनिर्देश गर्ने र अमेरिकी लक्ष्यहरूविरुद्ध आक्रमण गर्न प्रेरित गर्थे ।

सन् २०११ मा लादेनको मृत्युपछि जवाहिरीले अलकायदाको जिम्मा लिएका थिए । अधिकारीहरूका अनुसार जवाहिरी सुरक्षित घरको बार्दलीमा थिए, जब ड्रोनले उनीमाथि दुईवटा मिसाइल प्रहार गरेको थियो ।

त्यहाँ परिवारका अरू सदस्यहरू पनि उपस्थित थिए । तर, उनीहरूलाई केही नभएको र आक्रमणमा जवाहिरीको मात्र मृत्यु भएको अधिकारीहरूको भनाइ छ ।