काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछानेको मुद्दा अदालत पुगेकै राति चितवनका जिल्ला न्यायाधिवक्ता शान्तिप्रसाद लुइँटेलको एकाएक काज सरुवा भयो । उनको महान्यायाधिवक्ता कार्यालयमै काज सरुवा भएको हो । 

महान्यायाधिवक्ता कार्यालयले उनको ठाउँमा उच्च सरकारी वकिलको कार्यालय बुटवलका उपन्यायाधिवक्ता रवि न्यौपानेलाई पठाएको छ ।  मंगलबार मात्रै जिल्ला सरकारी वकिल कार्यालय चितवनले साहारा सहकारी ठगी प्रकरणबारेको मुद्दा अदातलमा दर्ता गरेको थियो । रविसहित ३२ जनालाई अभियुक्त बनाएको छ ।

जसमध्ये रविको हकमा भने जिल्ला सरकारी वकिल कार्यालयले ठगी मुद्दा मात्रै मुद्दा चलाएको थियो । तर, चितवनबाहेकका तीन जिल्लामा सहकारी ठगीका अतिरिक्त संगठित अपराध मुद्दा पनि चलाएको थियो ।

काठमाडौंको स्वर्णलक्ष्मी र रुपन्देहीको सप्रिम सहकारी ठगी प्रकरणमा उनीविरुद्ध संगठित, ठगी मुद्दा चलेको थियो ।  पोखरामा भने संगठित ठगी तथा सम्पत्ति शुद्धीकरण मुद्दा चलेको छ ।  रविबाहेक सहकारी ठगीका मुख्य आरोपी ओखलढुंगाका गितेन्द्रबाबु राई (जीबी) सहित १२ जनाविरुद्ध भने चितवनमा समेत संगठित अपराध मुद्दा दर्ता भएको छ ।

रविलाई संगठित मुद्दाबाट जोगाउँदै ठगीमा मात्रै मुद्दा चलाउनु ‘गम्भीर कैफियतपूर्ण’ देखिएको निस्कर्षसहित नायव महान्यायाधिवक्ता गोपालप्रसाद रिजालको संयोजकत्वमा चार सदस्यीय छानबिन समिति गठन भएको छ ।

समितिमा महान्यायाधिवक्ता कार्यालयका प्रवक्तासमेत रहेका सहन्यायाधिवक्ता सूर्यराज दाहाल, उच्च अदालत सरकारी वकिल कार्यालय हेटौँडाका सहन्यायाधिवक्ता ईश्वरीप्रसाद ढकाल, महान्यायाधिवक्ताको कार्यालयका उपन्यायाधिवक्ता रुद्रप्रसाद आचार्य सदस्य छन् ।

यद्यपि रास्वपाले राष्ट्रसेवक कर्मचारीमाथि रवि लामिछानेका नाममा सरकारले दुःख दिएको प्रतिक्रिया दिएको छ । 

रविको मुद्दासित जोडेर सरुवा गरिएका जिल्ला न्यायाधिवक्ता लुइँटेल एक्ला होइनन् । यसअघि चितवनमा रवि लामिछाने पक्राउको विरोधमा उत्रिएका प्रदर्शनकारी दबाउन नसकेको भन्दै चितवन प्रहरी प्रमुख प्रहरी उपरीक्षक (एसपी) र सीडीओ इन्द्रदेव यादव समेत तानिएका थिए । 

लामिछाने कात्तिक २ गते पक्राउ परेका थिए । त्यसको विरोधमा चितवनमा रास्वपाका समर्थकले प्रधानमन्त्री केपी शर्मा ओलीको पुत्ला बनाउँदै नारायणी नदीमा पुत्ला दहन गरेका थिए ।

त्यही विषयमा प्रहरी प्रधान कार्यालयले एसपी भावेश रिमाल र सीडीओ यादवलाई तान्दै उनको ठाउँमा अर्का एसपी गौमत मिश्र र सीडीओमा गृह मन्त्रायबाट सहसचिव प्रकाश पौडेललाई पठाएको थियो । त्यतिबेला सीडीओ चार महिनामै तानिएका थिए भने एसपी रिमाल समेत नौ महिनामै  ।

चितवन पठाइएका मिश्र मानव बेचबिखन अनुसन्धान ब्यूरोमा कार्यरत थिए ।  रिमाललाई प्रहरी प्रधान कार्यालयले ब्यूरोमा काज सरुवा गरेको थियो । रवि जोडिएको चितवनको साहारा सहकारीको रकम अपचलनबारेको अनुसन्धान एसपी मिश्रले गरेका थिए । 

पोखराको सूर्यदर्शन सहकारी प्रकरण अनुसन्धान गर्न थुनामा राखिएका रविलाई बयानका लागि चितवन बोलाइएको थियो । रवि मंसिर १८ गते बयानका लागि चितवन पुगेका थिए ।

चितवनमा २ दिन बयान दिएका लामिछानेलाई चितवन प्रहरीले मध्यरातमै पोखरा फिर्ता पठाएको थियो । प्रहरीले रविलाई मध्यरातमा पोखरा पुर्‍याएको घटनाको विरोध भएको थियो । उक्त प्रकरणबारे राष्ट्रिय मानव अधिकार आयोगले समेत चासो दिँदै महानिरीक्षक वसन्त कुँवरलाइ उपस्थितिका लागि पत्र पठाएको थियो । तर उनी उपिस्थत नभइ त्यसबेलाका प्रवक्ता डीआइजी दानबहादुर कार्की र प्रहरी प्रधान कार्यालय अपराध अनुसन्धान विभागका प्रमुख एआइजी टेक तामाङ उपस्थित भएका थिए ।

रविको अनुसन्धान गरेका एसपी मिश्रलाई हाल चितवनबाट सबैभन्दा आकर्षक मानिने जिल्ला पर्साको जिम्मा दिइएको छ । 

चितवनबाट तीन महिनामै उनी पर्सा सरुवा भएका हुन् । प्रहरीमा त्यसरी एक जिल्लाबाट अर्को जिल्लाको प्रमुख बन्दै जाने एसपी मिश्र अपवादका पात्र बनेका छन् ।  सरकारले माघ ११ गते एसपी मिश्रसहित अन्य १७ एसपीको सरुवा भएको थियो ।