काठमाडौं । नेपाली फुटबलमा पहिल्लो समय चर्चामा रहेका गौरव थापाले फिफा र एएफसीलाई अमान्य हुने गरी अखिल नेपाल फुटबल संघ (एन्फा)मा आफूले कुनै भूमिका नखोजेको बताएका छन् । नेपाली फुटबललाई बन्धक बनाउने प्रयास कुनै हालतमा स्वीकार्य नहुने पनि उनले बताएका छन् ।

बुधबार विज्ञप्ति जारी गर्दै उनले नेपाली फुटबलको विनाश चाहने एक समूहले संगठित रूपमा आफूविरुद्ध षड्यन्त्र गरिरहेको भन्दै त्यो दुर्भाग्यपूर्ण भएको उल्लेख गरेका छन् ।

“मैले कहिल्यै पनि एन्फामा कुनै पदका लागि कसैलाई अनुरोध वा दबाब दिएको छैन । बरु, वर्तमान अध्यक्ष र महासचिवले नै सहयोग गर्न भनेर मेरो नाम प्रस्ताव गर्नुभएको हो । वर्तमान अध्यक्ष, महासचिव र कार्यसमितिका पदाधिकारी र सदस्यहरूसँग मेरो यस विषयमा छलफल भएको छ । उहाँहरूले प्रत्येकपटक बजारमा प्रचार गरिएजस्तो कुनै समस्या नरहेको बताउँदै आउनुभएको छ,” थापाले विज्ञप्तिमा लेखेका छन्, “नेपाली फुटबलको विनाश चाहने एउटा समूहले संगठित रूपमा गरिरहेको षड्यन्त्र दुर्भाग्यपूर्ण छ । अझ त्यसमा मेरो नाम समेत जोडिनु झनै आश्चर्यजनक र दुःखद छ । म फेरि पनि प्रष्ट पार्न चाहन्छु कि यस्तो फोहोरी राजनीतिमा मेरो हिजो पनि कुनै संलग्नता थिएन । अहिले पनि छैन ।”

एन्फाका पूर्वअध्यक्ष गणेश थापाका छोरा हुन्, गौरव । अहिले गौरवलाई एन्फाको प्रमुख कार्यकारी अधिकृत (सीईओ)मा नियुक्त गर्ने विषयले विवादमा सुरु भएको छ ।

गएको एन्फा निर्वाचनमा तत्कालीन अध्यक्ष कर्माछिरिङ शेर्पालाई हराउनका लागि गणेश थापा, पंकज नेम्वाङ र नवीन पाँडे एकै ठाउँमा उभिएका थिए । निर्वाचनका क्रममा नेम्वाङ–पाँडे पक्षले थापासमक्ष गौरवलाई सीईओ नियुक्त गर्ने बचन दिएको थापा पक्षको भनाइ छ । सोहीअनुसार गौरवलाई नियुक्त गर्नुपर्नेमा थापा पक्षले जोड दिएको छ ।

तर, नेम्वाङ–पाँडे पक्ष गौरवलाई कुनै हालतमा एन्फामा प्रवेश नदिने अडानमा छ । जसका कारण यही साउन ५ गतेका लागि बोलाइएको बैठक एजेन्डमा प्रवेश नै नगरी स्थगित गरिएको थियो । उक्त बैठक त्यसअघि साउन २ गतेका बेलाइएको थियो । तर, त्यस दिन पनि अचानक अध्यक्ष नेम्वाङको स्वास्थ्यमा समस्या आएपछि बैठक स्थगित गरिएको थियो ।

तत्कालीन एएफसी अध्यक्ष मोहम्मद बिन हमामबाट गौरवका नाममा एक लाख अमेरिकी डलर आएको र त्यसैलाई प्रमाणको आधार बनाएर फिफाले गणेश थापामाथि प्रतिबन्ध लगाएकाले उनलाई नियुक्त गर्न नमिल्ने जिकिर नेम्वाङ–पाँडे पक्षले गर्दै आएको छ । गौरव त्यसलाई गलत भन्छन् ।

“आफ्नो व्यक्तिगत फाइदाको घेरामा रुमल्लिइरहेका केही स्वार्थी मानिसले लगातार गलत सूचनाहरूमार्फत अफवाह फैलाइरहेका छन् । पछिल्ला दिनहरूमा यदि मलाई एन्फामा नियुक्त गरिए फिफा र एएफसीले अस्वीकार गर्छ भन्नेजस्ता नकारात्मक, भ्रामक र प्रायोजित खबरहरू नियमित रूपमा प्रवाह गरिइरहेकोमा मेरो ध्यानाकर्षण भएको छ,” गौरवले लेखेका छन्, “यो सफेद झुट र प्रायोजित रूपमा चलाइएको प्रपोगण्डा मात्र हो ।”

गौरबले एन्फा अध्यक्ष नेम्वाङ र महासचिव किरण राईले गएको महिना फिफा र एएफसीमा पटक–पटक सम्पर्क गरेर यो विषयमा स्पष्टता खोजेको आफ्नो जानकारीमा रहेको बताएका छन् । त्यसमा फिफा र एएफसीलाई कुनै समस्या नरहेको प्रस्ट पारिइसकेको उनको भनाइ छ । विशेषगरी महासचिवलाई फोन, म्यासेज र प्रत्यक्ष भेटघाटको बेला पनि उक्त विषयमा प्रस्ट पारिइसकेको गौरवले जिकिर गरेका छन् ।

साथै, बंगलादेशमा सम्पन्न साफको बैठकका क्रममा एएफसीका केही अधिकारीहरूले महासचिव राईलाई आफ्नो नियुक्तिको विषयले कुनै फरक नपार्ने स्पष्ट जानकारी गराइएको गौरवले उल्लेख गरेका छन् ।

उनले सन् २०१३ देखि २०१८ को बीचमा आफूले पटक–पटक एन्फामा काम गरिसकेको बताएका छन् । पछिलोपटक २०१७ मा नरेन्द्र श्रेष्ठ अध्यक्ष हुँदा अन्तर्राष्ट्रिय सम्बन्ध प्रमुखका रूपमा काम गरेको उनले जानकारी दिएका छन् ।

“त्यस समयमा मैले फिफा र एएफसीको म्याच कमिस्नरको काम पनि गरेको थिएँ । साथै, एफसी फुटबल एड्मिनिस्ट्रेसन सर्टिफिकेट कोर्स पनि गरेको छु । यो कोर्स एएफसीले विशेषगरी सदस्य संस्थामा भविष्यमा व्यवस्थापनको सिनियर पदमा रहेर काम गर्न सक्षम जनशक्ति उत्पादनको उद्देश्यसहित तयार गरेको हो,” गौरवले भनेका छन्, “वर्तमान अध्यक्ष र महासचिव मैले एन्फामा काम गरेको त्यो समयमा कार्यसमितिको सदस्य र उपमहासचिव हुनुहुन्थ्यो भन्ने कुरा यहाँ स्मरण गर्नु जरुरी हुन्छ । किनभने, उहाँहरूलाई त्यो बेला कुनै समस्या नभएको प्रत्यक्ष जानकारी छ ।”

२०१७ मा एएफसीका तत्कालीन अध्यक्ष र एएफसीका महासचिव नेपाल भ्रमणमा आउँदा आफू अन्तर्राष्ट्रिय सम्बन्ध प्रमुख रहेको र सोही हैसियतमा एएफसी र एन्फा प्रतिनिधिहरूबीच भएका सबै छलफलमा सहभागी भएको उनले बताएका छन् ।

“मैले एन्फामा काम गरेको समयमा कुनै समस्या आएको थियो ? वा उनीहरूले अहिले प्रस्तुत गरिरहेको दुर्भावनापूर्ण एजेन्डामा बल पुग्ने कुनै घटना भएको थियो ?,” गौरवले प्रश्न गरेका छन्, “यस्ता अनर्गल र हावादारी कुरा गरेर कसैको व्यक्तित्वमाथि धावा बोल्न खोज्दा उनीहरूले यस्ता प्रश्नको उत्तर दिन सक्नुपर्छ । अहिले केही स्वार्थी मानिसले स्थापित गर्न खोजेको भाष्यमा न कुनै तर्क छ न सत्यता नै । फिफा र एएफसीलाई अमान्य गरी मैले एन्फामा कुनै पनि भूमिका चाहेको छैन ।”

नवीन पाँडेलाई लक्षित गर्दै उनले थप लेखेका छन्, “फिफा, एएफसी र एन्फामा कुनै समस्या नभए पनि केही स्वार्थी मानिसले निश्चित मिडियालाई गलत सूचना दिएर विवाद सिर्जना गर्दै नेपाली फुटबललाई अप्ठेरोमा पार्ने काम गरिरहेका छन् । फिफा र एएफसीका विषयमा गलत सूचना दिने र झुटो बोलेर नेपाली फुटबललाई बन्धक बनाउने प्रयास कुनै पनि हालतमा स्वीकार्य हुन सक्दैन ।”